Рубілі так, што ажно шчэпкі ляцелі
Раённы чэмпіянат па колцы дроў «Шуміліншчына рубіць!» сярод працоўных калектываў і кіраўнікоў арганізацый стаў у мінулую суботу галоўнай падзеяй свята «Маладзецкім забавам снег не перашкода».
За званне лепшых дрывасекаў-аматараў змагалася 18 каманд, у асабістым заліку – 6 жанчын і 15 мужчын – кіраўнікі арганізацый ці іх намеснікі. Чэмпіянат прайшоў пад эгідай раённай арганізацыі РГА «Белая Русь». На гарадскім стадыёне было весела і горача, дровы рубілі так, што ажно шчэпкі ляцелі ў розныя бакі. Пры гэтым ніводная сякера не пацярпела! Важнай і галоўнай умовай турніру было захаванне правілаў бяспекі: арбітры пільна сачылі, каб усе выступалі ў акулярах і пальчатках.
Нагадаем, што ініцыятыва правядзення падобных спаборніцтваў належыць Прэзідэнту нашай краіны Аляксандру Лукашэнку. Чэмпіянат сярод сродкаў масавай інфармацыі ў гэтым годзе прайшоў ужо ў трэці раз, і па традыцыі непасрэдны ўдзел у ім прыняў кіраўнік краіны, прадэманстраваўшы майстар-клас па спрадвечным сялянскім занятку. Сёлета флэшмоб, пачаты Прэзідэнтам, падхапілі многія раёны Віцебшчыны. Пра гэта падчас вітальнага слова ўзгадаў старшыня райвыканкама Сяргей Галынчык і выказаў спадзяванне, што мерапрыемства стане і ў нашым раёне традыцыйным і любімым.
Спаборніцтвы пачаліся з камандных выступленняў (два мужчыны і адна жанчына). Па ўмовах конкурсу мужчынам трэба было рассячы на хуткасць калоду на 6 паленцаў, жанчынам – на чатыры. Галоўнае не перамога, а ўдзел, гаварылі многія, але на пляцоўцы ўсё адно стараліся з усіх сіл, выкладваліся на ўсе 100 працэнтаў, чым і выклікалі бурную і гарачую падтрымку ў балельшчыкаў.
«Дровы апошні раз секла гадоў дваццаць ці трыццаць таму, –– прызналася кіраўнік Цэнтра па забеспячэнні дзейнасці бюджэтных арганізацый Ларыса Маладзечкіна. – Каманду ніяк не магла падвесці. Знайшла смеласць прыняць удзел. Адзін вечар брала ўрокі па колцы ў калегі Вячаслава Кавалёнка. Вельмі старалася. Рада, што справілася добра». А вось некаторыя прадстаўніцы прыгожай паловы чалавецтва – з раёна электрычных сетак, УП ЖКГ, раённага цэнтра гігіены і эпідэміялогіі – дык і наогул прадэманстравалі вышэйшы пілатаж, далі фору калегам-мужчынам. Вось ужо, сапраўды, нашым беларускім жанчынам усё па плячы: і дзяцей нараджаць, і супы варыць, і на абцасах хадзіць, і дровы калоць па-сапраўднаму. Хаця былі і такія, хто сякеру трымаў у руках ці не першы раз – тым цікавей былі іх разборкі.
А вось мужчыны адчувалі сябе на пляцоўцы больш упэўнена. Бачна было, што са справай яны знаёмыя, сякеру ў руках адназначна трымалі, ведаюць галоўныя лайфхакі, маюць свае сакрэты колкі. Многія на чэмпіянат прыйшлі са сваім апрабаваным інструментам, які адчуваюць і якому давяраюць. Па-гаспадарску, адным словам!
Тон задавалі многія: і старшыня райвыканкама Сяргей Галынчык, які выступаў за каманду райвыканкама, і старшыня раённага Савета дэпутатаў Мікалай Будневіч, які выступаў у складзе каманды сельскіх Саветаў дэпутатаў, і дырэктар УП ЖКГ Аляксей Шпакаў з дырэктарам СДЮШАР Алегам Асташонкам, якія ўзначалілі свае каманды. Узрост у выніку не меў практычна ніякага значэння: «рубіла фішку» як моладзь, так і вопытныя заўзятыя дрывасекі. Яўных фаварытаў на перамогу назваць было вельмі складана. У тым і заключалася інтрыга.
Індывідуальны залік прайшоў не менш азартна і захапляльна. Спачатку на пляцоўцы выступілі кіраўнікі-жанчыны. Дакладнае валоданне сякерай і хуткія секунды прадэманстравала дырэктар Башнёўскай базавай школы Валянціна Скірман, зноў жа ўдала выступілі Ларыса Маладзечкіна, Святлана Батакова з РЦГЭ. У мужчын-кіраўнікоў па-ранейшаму было ўсё стабільна моцна і выверана. Многія, як, напрыклад, першы намеснік начальніка РАНС Алег Даніловіч і начальнік раённага ўчастка электрычнай сувязі Юрый Маскалькоў прадэманстравалі свае асабістыя падыходы ў колцы. Поспех заключаўся ў хуткасці выканання задачы –– мужчынам трэба было рассячы калоду на 8 частак, жанчынам – на 6.
І вось выніковы камандны пратакол гатовы. Тройка лідараў чэмпіянату па колцы дроў «Шуміліншчына рубіць!» выглядае так: сярод арганізацый «золата» –– у трыа Цэнтра па забеспячэнні дзейнасці бюджэтных ар-анізацый Шумілінскага раёна, «срэбра» –– у каманды УП ЖКГ Шумілінскага раёна, «бронза» –– у каманды Шумілінскага раённага цэнтра гігіены і эпідэміялогіі. У індывідуальным заліку лепшыя вынікі паказалі дырэктар Башнёўскай базавай школы Валянціна Скірман і начальнік участка электрычнай сувязі Юрый Маскалькоў. Граматы і кубкі пераможцам уручыў старшыня райвыканкама Сяргей Галынчык.
Многія цікаўныя гледачы задавалі пытанне: куды дзенуць нарыхтаваныя падчас чэмпіянату дровы? Расказваем. Загружаны палівам прычэп (дровы, дарэчы, пагрузілі члены ваенна-патрыятычнага клуба «Юны гвардзеец» Шумілінскай СШ №1 разам з кіраўніком Сяргеем Сахончыкам) адправіўся да жыхаркі вёскі Сіроціна Вольгі Уладзіміраўны Габрусёнак, якая ўсё жыццё адпрацавала на карысць раёна і сёння мае патрэбу ў дапамозе і падтрымцы. Увечары ў той жа дзень старшыня Сіроцінскага сельсавета Аксана Шынкевіч паведаміла рэдакцыі, што тавар дастаўлены адрасату. Пенсіянерка была вельмі кранута ўвагай і шчыра дзякавала ўсім за аказаную дапамогу.
Спаборніцтвы прайшлі відовішчна, ярка і весела, раскрылі працоўныя сілы, умацавалі камандны дух і далі магчымасць у чарговы раз пераканацца ў тым, што разам мы вялікая сіла.
* * *
Дапоўнілі раённае свята яшчэ некалькі цікавых спартыўна-забаўляльных лакацый на любы густ і ўзрост. Добрым настроем і пазітывам зарадзілі калядоўшчыкі, якія спявалі, танцавалі, цешылі народ жартамі і пацешкамі, вадзілі карагоды.
Правесці некалькі гадзін на свежым паветры, паўдзельнічаць у эстафетах “Старт–азарт” і “Вясёлая зімовая эстафета” – цудоўны адпачынак для выхаднога дня. Перамог у «Вясёлай зімовай эстафеце» калектыў дзіцячага сада № 4 г. п. Шуміліна, другое месца – у каманды ОКЗ, трэцяе – у райаддзела па надзвычайных сітуацыях.
Для удзельнікаў і гасцей свята былі арганізаваны гандлёвыя рады, можна было пагрэцца гарачым чаем і кавай, падсілкавацца юшкай, кашай і выпечкай.
ДЗЕЛІМСЯ ЎРАЖАННЯМІ
Наталля Вінаградава: Мерапрыемства проста супер! Вось на такім пазітыве трэба праводзіць выхадныя дні, а не ляжаць на канапе перад тэлевізарам. З задавальненнем глядзела, як рубяць дровы ўдзельнікі. Мы з калегамі не секлі дровы, але ж камандай удзельнічалі ў зімовых эстафетах і занялі першае месца, чаму бязмежна рады.
Сяргей Пашкевіч: Прымаў удзел у спаборніцтвах у складзе каманды ад райкама прафсаюза работнікаў АПК. Вырас у вёсцы, дровы ўмею калоць з дзяцінства, таму хваляванняў не было. Але каб на хуткасць рубіць – такое ў маім жыцці ўпершыню.
Юрый Маскалькоў: Арганізацыя мерапрыемства на вышыні! Стаць лепшым у індывідуальным заліку мне, напэўна, дапамагла асабістая сякера, якую прынёс з сабой. У такой справе нельга карыстацца чужым інструментам.
Алег Даніловіч: Здорава! Відовішчна! Такія спаборніцтвы, якія падтрымліваюць ініцыятыву Кіраўніка нашай дзяржавы па рубцы дроў, – выдатная ідэя! Мерапрыемства аб’яднала людзей, калектывы, сем’і. Была нагода паказаць, што мы таксама можам рубіць так, каб шчэпкі ляцелі!
Алена КАРПУШЭНКА, Ларыса ЗАЙЦАВА.
