За кулісамі святочных мерапрыемстваў
Да пачатку калядных і навагодніх святаў застаўся тыдзень. Рэдакцыя вырашыла зазірнуць за кулісы святочных мерапрыемстваў, каб раскрыць сакрэтныя планы работнікаў культуры, якія рыхтуюць для шумілінцаў вялікую святочную праграму.
Запальванне галоўнай раённай ёлкі ў гарадскім парку Шуміліна прайшло 16 снежня падчас старту рэспубліканскай дабрачыннай акцыі «Нашы дзеці».
24 снежня, напярэдадні каталіцкіх Калядаў і Ражаства, пройдзе традыцыйнае шэсце Дзедаў Марозаў, Снягурак і іншых казачных персанажаў, падчас якога апякун адыходзячага года Дракон перадасць эстафету гаспадыні 2025 года Змяі. У гарадскім парку каля галоўнай ёлкі адбудзецца тэатралізаванае прадстаўленне «Навагодняя тусоўка».
25 снежняў раённым цэнтры культуры адбудзецца прэм’ера навагодняй казкі «Па шчупаковай волі» і святочны ранішнік «Навагодні казкаГрад».
Галоўны герой Новага года Дзед Мароз расказаў, што сваю рэзідэнцыю, у якой так палюбілі бываць шумілінскія малышы, ён сёлета вырашыў перанесці на гарадскі стадыён Шуміліна, дзе будзе прымаць усіх жадаючых 29 і 30 снежня. «Туды больш зручна дабірацца жыхарам і райцэнтра, і іншых
населеных пунктаў. А казачную атмасферу і прыгоды мае памочнікі забяспечаць па поўнай праграме», – запэўніў навагодні Дзед.
У навагоднюю ночкаля галоўнай ёлкі ў гарадскім парку «Навагодні дзвіж» пачнецца ў 1 гадзіну ночы 1 студзеня ўжо ў новым 2025 годзе, пасля 2.30 вяселле прадоўжыцца на навагодняй дыскатэцы ў РЦК.
Напярэдадні праваслаўных Калядаў, 6 студзеня,у РЦК адбудзецца дабрачынны канцэрт «Пад белым покрывам Ражаства».
Не дадуць работнікі культуры сумаваць і ў астатнія дні. РЦК прапануе шматлікія забаўляльныя мерапрыемствы для дзяцей і падлеткаў на працягу ўсіх зімовых канікулаў. Будзе час адпачыць і дарослым як на розных клубных мерапрыемствах, так і масавых – каля гарадской ёлкі.
Не пройдзе свята і міма жыхароў сельскіх населеных пунктаў: святочныя мерапрыемствы будуць арганізаваны ва ўсіх установах культуры і адукацыі раёна.
Таксама раённы цэнтр культуры па заяўках прапануе навагоднія віншаванні, ранішнікі, дыскатэкі, праграмы ў працоўных калектывах і прыватных дамах. Не спазніцеся запрасіць Дзеда Мароза да сябе ў госці!
Агляд навагодняй праграмы рабіў Сяргей ЕРМАЛАЕЎ.
