«Давай служыць разам!»
Хочаш абараняць законныя правы і інтарэсы людзей, мець дастойную зарплату, ахоўваць правапарадак? У такім разе тваё месца – у органах унутраных спраў, даводзілі старшакласнікам супрацоўнікі УУС Віцебскага аблвыканкама падчас Дня адкрытых дзвярэй «Давай служыць разам!», які прайшоў у СШ № 1 г. п. Шуміліна.
Перад старшакласнікамі сярэдніх школ раёна выступілі супрацоўнікі Упраўлення ўнутраных спраў аблвыканкама і расказалі пра асаблівасці службы, льготы для міліцыянераў. З відэафільма вучні даведаліся пра паліграфы, дэтэктары хлусні.
Намеснік начальніка РАУС Аляксандр Шумінскі і оперупаўнаважаны крымінальнага вышуку Максім Васільеў расказалі пра асаблівасці паступлення ў Акадэмію МУС Рэспублікі Беларусь і Магілёўскі інстытут.
Дзень адкрытых дзвярэй упрыгожылі дзіцячыя канцэртныя нумары, а таксама паказальныя выступленні атрада міліцыі асаблівага прызначэння УУС аблвыканкама. Старшакласнікаў чакалі інтэрактыўныя пляцоўкі, дзе можна было пазнаёміцца са зброяй і спецсродкамі, якія міліцыянеры выкарыстоўваюць падчас службы, прыме-рыць фуражку, рашыць тэсты і атрымаць за гэта падарунак, паспрабаваць сілы ў правілах дарожнага руху, праверыць трапнасць у ціры.
Мерапрыемства прайшло цікава і з карысцю. Напрыканцы сустрэчы старшакласнікам уручылі агітацыйныя лістоўкі з запрашэннем на вучобу ў ведамасныя ўстановы адукацыі.
Ларыса ЗАЙЦАВА.
