Даводзіцца ўлічваць умовы надвор’я
Шумілінская ПМК‑70 вядзе капітальны рамонт шматкватэрнага дома № 4 па вуліцы Луначарскага ў Шуміліне. Гэта трэці дом у райцэнтры, які сёлета рамантуецца капітальна: завершаны рамонт дома № 41 па вуліцы Юбілейнай і дома № 2 па вуліцы Вакзальнай. Сродкі выдаткаваны з бюджэту (265 тысяч рублёў) і адлічэнняў грамадзян на капрамонт (307 тысяч рублёў).
«Можна сказаць, дом па вуліцы Луначарскага самы складаны, – расказаў галоўны інжынер Шумілінскай ПМК‑70 Раман Карасёў. – Усе работы тут вядуцца ў IV квартале, згодна з зацверджаным графікам. А гэта дажджы, пахаладанне. Вось і прыходзіцца лавіць пагодныя дзянькі, каб якасна выканаць работы. З улікам інтарэсаў жыльцоў».
У доме ўжо практычна закончаны электрычныя работы, падчас якіх будуць заменены электраабсталяванне ў шчытках, частка электраправодкі ў месцах агульнага карыстання, зроблена перападключэнне кватэр жыхароў дома да сістэмы.
Зараз поўны ходам ідуць работы на даху. Ужо пакладзены два слаі, плануецца, што на гэтым тыдні будуць класці апошні верхні слой руберойду. Працягнуцца фасадныя работы (апрацоўка швоў, тынкоўка, фарбаванне). «Усё залежыць ад умоў надвор’я, – заўважае Раман Карасёў. – У недажджлівыя дні на кроўлі працавала да 11 будаўнікоў, на фасадзе – да 10. Працавалі з 7 гадзін раніцы да 7 вечара».
Працягваюцца сантэхнічныя работы. «Гэта быў найбольш балючы момант для жыхароў дома, – адзначае Раман Васільевіч. – Ім прыйшлося некалькі дзён пабыць без ацяплення. Нашы сантэхнікі стараліся хутка зрабіць разводку труб ацяплення. І палове кватэр далі ацяпленне праз шэсць дзён пасля афіцыйнага пачатку ацяпляльнага сезона. Работы па ўсім доме былі завершаны на працягу наступнага тыдня».
Падчас капітальнага рамонту будуць заменены вокны і дзверы ў месцах агульнага карыстання, зманціраваны новыя вентыляцыйныя шахты, заменены стаякі каналізацыйнай сістэмы і водаправодных труб.
Аляксандр ШЭДЗЬКО.
