За курэнне ў ложку – штраф?
Ці праўда, што за курэнне ў ложку можна атрымаць штраф? – такое пытанне задаў наш чытач.
Адказ на яго мы папрасілі даць намесніка начальніка РАНС Алега Бунто:
– Курэнне ў ложку – заўсёды небяспечны «сцэнарый». Выклікаўшы тленне гаручага матэрыялу, акурак праз некаторы час можа і згаснуць, але вось утвораны ім ачаг ператворыцца ў пажар. І дым прывядзе да ўдушша перш, чым пажар будзе знойдзены.
Курэнне ў нецвярозым стане нязменна стаіць у першым радку прычын пажараў і смерці. Курэнне само па сабе вельмі шкодзіць здароўю і можа стаць прычынай сур’ёзных захворванняў. А вось цыгарэта ў руках нецвярозага грамадзяніна, які вырашыў расслабіцца і закурыць у ложку, можа ў адно імгненне пазбавіць яго жыцця. За бягучы перыяд 2024 года ў Шумілінскім раёне адбылося 5 такіх пажараў.
Такім аматарам хочацца нагадаць, што згодна з Правіламі пажарнай бяспекі грамадзянам забаронена пакідаць запаленыя свечкі, курыць у ложку ці іншым месцы для сну, выкідваць непатушаныя цыгарэты, запалкі з аконных праёмаў, з балконаў шматкватэрных жылых дамоў, у смеццевыя кантэйнеры, урны на прыдамавой тэрыторыі.
За дадзенае правапарушэнне прадугледжана адміністрацыйная адказнасць у адпаведнасці з заканадаўствам Рэспублікі Беларусь (штраф да 5 БВ).
З пачатку года ў Шумілінскім раёне да адміністрацыйнай адказнасці з-за курэння ў ложку прыцягнуты 15 чалавек, з іх адзін чалавек за паўторнае парушэнне атрымаў штраф 2 БВ (80 руб.), 14 атрымалі папярэджанні.
