За кожнай перамогай – камандны дух і асоба трэнера
27-29 верасня ў Шумілінскай СДЮШАР прайшоў традыцыйны адкрыты абласны турнір па валейболе сярод хлопцаў 2011-2012 гадоў нараджэння памяці трэнера-выкладчыка Анатоля Завадскага. У госці прыехалі калектывы з Бешанковіч, Мінска (дзве каманды), Пскова і Адзінцова (Маскоўская вобласць).
Валейбольныя заўзятары штогод чакаюць канец верасня, калі на шумілінскай зямлі можна паглядзець лепшыя валейбольныя каманды з Беларусі і Расіі. Турнір па валейболе памяці трэнера-выкладчыка Анатоля Завадскага стаў спартыўным брэндам Шумілінскага раёна.
Валейбалісты, трэнеры і балельшчыкі хвілінай маўчання ўшанавалі памяць трэнера А. Я. Завадскага, капітаны каманд разам з дырэктарам Шумілінскай СДЮШАР Алегам Асташонкам усклалі кветкі да мемарыяльнай дошкі Анатоля Яўгенавіча. На турніры прысутнічаў сын трэнера Сяргей. «Вельмі рады, што справа майго бацькі працягваецца, і ў Шуміліне валейбол па-ранейшаму спорт нумар адзін, – адзначыў Сяргей Завадскі. – Хочацца падзякаваць кіраўніцтву раёна, калектыву спартыўнай школы на чале з дырэктарам Алегам Асташонкам за тое, што, дзякуючы турніру, у шумілінскіх валейбольных заўзятараў ёсць магчымасць пабачыць валейбольныя гульні высокага ўзроўню. Прыемна, што шумілінская валейбольная школа працягвае заставацца адной з лепшых у рэспубліцы».
Сёлетні турнір падарыў багата цікавых сустрэч: усе каманды былі прыкладна аднаго ўзроўню, і ад гэтага выйгралі ўсе. Шумілінская каманда, за якую выступалі Павел Лінкевіч, Яраслаў Канстанцінаў, Арцём Красікаў, Дзяніс Кісліцын, Арсеній Саўчанка, Арсеній Кулікаў, Ягор Гаеў, Андрэй Сідарэнка, Мікіта Аксёнаў і Марк Ягораў, у першай гульні без вялікіх праблем разабралася з бешанковіцкімі ігракамі.
Сустрэча «Шуміліна» – «Адзінцова» праходзіла адразу пасля ўрачыстага адкрыцця і сабрала вялікую глядацкую аўдыторыю. Нашы хлопцы проста разгубіліся, і ў першай партыі ў іх нічога не атрымлівалася. І вось яна – асоба трэнера! Любоў Бабова знайшла ў перапынку патрэбныя словы, і на пляцоўку выйшла зусім іншая каманда, зараджаная на перамогу. Вынікам гульні стала перамога з лікам 3:1.
Многія чакалі сустрэчу паміж «Шуміліна» (лепшай каманды па атацы) і «Псковам» (лепшай каманды па абароне). І гульня апраўдала чаканні. Адна партыя – за аднымі, наступная – за другімі. Гульня ачко ў ачко. І ўсё-такі перамагла атака: 3:2 на карысць шумілінскіх валейбалістаў.
Да сваёй сустрэчы «Шуміліна» і «Мінск-1» падышлі без паражэнняў, і ў асабістым супрацьстаянні павінны былі вызначыць пераможцу. Толькі вось барацьбы на ўвесь матч не атрымалася: шумілінцы дамініравалі ва ўсіх кампанентах гульні і пераканаўча з лікам 3:0 (25:23, 25:16, 25:17) перамаглі.
Прызавая тройка турніру выглядае так: першае месца – «Шуміліна», другое – «Мінск‑1», трэцяе – «Пскоў». Узнагароды юным валейбалістам уручыў старшыня раённай арганізацыі «Саюз ваенных маракоў» Віктар Прыходзька.
На цырымоніі закрыцця быў і яшчэ адзін яркі момант: бацькі шумілінскіх валейбалістаў са словамі «Дзякуем за працу, за вашы адносіны да дзяцей!» уручылі трэнеру Любові Бабовай букет кветак.
Аляксандр ШЭДЗЬКО.
