Варта павялічыць тэмпы работы!
Надзённая задача для ўсіх сельгаспрадпрыемстваў раёна – падрыхтоўка фермаў да зімы. Як расказалі спецыялісты райсельгасхарчу, зараз актыўна вядуцца работы на ферме Маркава ААТ «Прыазёрны мір» і на ферме Паратоўка УП «Шумілінскі райаграсэрвіс».
На ферме Паратоўка мы заспелі за работай мужчын з піламі і дошкамі. Гэта памочнікі з арганізацый раёна. «Вось прыехалі у сельгаспрадпрыемства, нас даслала сюды кіраўніцтва, – расказалі старшы станочнік Дзмітрый Андрэеў і сталяр Аляксандр Міхальчанка ўчастка дрэваапрацоўкі УП ЖКГ. – Пастаўлена задача давесці бычнік да ладу.
Мы і рады дапамагчы, многае ўмеем. Устанавілі драўляныя каркасы на 22 аконныя праёмы памяшкання, якое ў мінулым годзе стаяла незапатрабаваным. Зараз вось выгінаем з ацынкоўкі канёк для даху. Будматэрыялы нам дастаўляюць своечасова». На даху фермы працавалі сталяры Юрый Федусоў і Валерый Васілеўскі, яны мянялі пашкоджаныя лісты шыферу на новыя.
У пазамінулым годзе ў гэтым памяшканні стаялі цёлкі перадзлучнога ўзросту, летась тут жывёлу не ставілі. На ферме вядуцца работы па рамонце гноетранспарцёра, зроблены ўваходныя вароты, устанаўліваюцца вокны і клеткі для жывёлы. На ферму плануюць паставіць больш за дзвесце бычкоў на дарошчванні.
КАМЕНТАРЫЙ СПЕЦЫЯЛІСТА РАЙСЕЛЬГАСХАРЧУ
Ягор ЗІМІН, галоўны спецыяліст упраўлення па сельскай гаспадарцы і харчаванні райвыканкама:
– Правялі маніторынг па падрыхтоўцы ферм і рамонтна-механічных майстэрняў да зімы. Усім сельгаспрадпрыемствам варта павялічыць тэмпы работы! Неадкладна варта распачаць рамонт на ферме Спаскае СУП «Лаўжанскае», дзе пад-лога і ўваходны тамбур з дэфектамі. Тое самае можна сказаць пра ферму Лявонава-1 КУСГП «Ульскі», дзе патрабуецца немалы рамонт сцен, даху, падлогі.
Што тычыцца рамонтна-механічных майстэрняў, арачнікаў, складоў, то таксама трэба паспяшацца. Напрыклад, у КУСГП «Сіроцінскі» будынак склада ў аварыйным стане. Тут трэба або рамантаваць дах, або ўвогуле памяшканне разбіраць. У майстэрні УП «Шумілінскі райаграсэрвіс» варта тэрмінова заняцца рамонтам памяшкання. Са слоў дырэктара Аляксея Рабініна, на гэтым тыдні будуць дастаўлены аконныя праёмы, застанецца падрамантаваць дах.
Ларыса ЗАЙЦАВА.
