Канец жніўня, а народ купаецца
Сёлета лета падарыла нам шмат цёплых і сонечных дзён для адпачынку на азерах. Вось і ў канцы жніўня мы купаліся і загаралі. Ці не забывалі пры гэтым пра бяспеку, і высвятляў карэспандэнт раённай газеты падчас рэйду з участковым інспектарам РАУС Аляксандрам Журавым, намеснікам старшыні камісіі па справах непаўналетніх райвыканкама Людмілай Грузневіч і першым сакратаром раённай арганізацыі ГА БРСМ Вікторыя Бяляевай.
На ўсіх наведаных намі азёрах былі людзі, купаліся, загаралі, адпачывалі. Многа дзяцей было на Шумілінскім возеры. «Малыя прыходзяць з дарослымі, – адзначылі матросы-ратавальнікі Юрый Лявонаў і Юрый Гутнікаў. – Да 14 год адным купацца забаронена!». На “брыкецкім пляжы” рэйдавая група адзначыла, што трэба пачысціць берагавую лінію ад чароту, абкасіць вакол. А яшчэ не перашкодзіла б перанесці сюды раздзявалку, якая ўстаноўлна каля аўтамабільнай паркоўкі, дзе няма зручнага падыходу да берага.
На возеры Разван у Непаротах вялікіх заўваг не было. Дзеці былі з дарослымі. Тэрыторыя свежа абкошаная.
На возеры ў Лескавічах адпачывалі з асноўным дарослыя. Участковы інспектар РАУС Аляксандр Жураў папярэдзіў, што за распіццё алкагольных напіткаў у грамадскім месцы пагражае штраф да 8 БВ. Матрос-ратавальнік Валянцін Цімашэнка расказаў, што за лета з калегам Юрыем Скорынавым «папрасіў» з вады з два дзясяткі нецвярозых. Такая пільнасць вельмі дарэчы.
Азёры Шумілінскае, Разван і Лескавіцкае – аф-цыйна дазволеныя для купання і абсталяваныя. Але ж людзі купаюцца і на іншых азёрах – на Будавесці ў Башнях, на Мурожніцкім у Язвіне. Падчас нашага прыезду тут адпачывалі гараджане. Дзеці купаліся пад наглядам дарослых. Супрацоўнік РАУС правёў прафілактычную гутарку. Прафілактыкі мала не бывае!
Ларыса ЗАЙЦАВА.
