Сяргей ГОМАНАЎ з ААТ «АграБаравінка» першым у раёне намалаціў тысячу тон зерня, а Віталь СІМАКОЎ з гэтай жа гаспадаркі першым перавёз тысячу тон збожжа. Лідараў уборачнай на жніўным полі ўчора, 5 жніўня, павіншаваў старшыня райвыканкама Сяргей ГАЛЫНЧЫК.
«Я ведаю, якая цяжкая праца на жніве, як нялёгка ўбіраць хлеб, – адзначыў Сяргей Аляксандравіч. – Вы першыя тысячнікі ў Шумілінскім раёне, і гэта заслугоўвае вялікай павагі. Вялікі дзякуй вам за працу, жадаю моцнага здароўя, намалаціць і перавезці ў сваім жыцці яшчэ не адну тысячу тон збожжа».
У жыцці Сяргея Гоманава сёлетняе жніво юбілейнае – трыццатае. А ў лідарах уборачнай ён у дваццаць пяты раз. Пакуль што ён адзіны ў раёне двухтысячнік.
Віталь Сімакоў у сельскай гаспадарцы каля паўтара дзясятка гадоў. Калісьці працаваў на камбайне і быў тысячнікам, зараз рупіцца памочнікам кіраўніка ААТ «АграБаравінка», а на час жніва перасеў на трактар МТЗ‑3522 і адвозіць зерне. Робіць да дзесяці збожжавых рэйсаў за дзень. На палеткі павіншаваць Віталя прыехала яго сям’я – жонка Ганна і дочкі Ніка і Дана.
Да віншаванняў тысячнікаў далучыліся начальнік райсельгасхарчу Уладзімір Пушноў, дырэктар ААТ «АграБаравінка» Яўген Мурашка, старшыня райкама прафсаюза работнікаў АПК Вольга Пусянкова.
Ларыса ЗАЙЦАВА.
