Валуны — не маўчуны…
Нядаўна пабачыла свет кніга краязнаўца і пісьменніка Антона Параскевіна (Віктара Улюценкі) пад назваю “У краі каменных волатаў”.
Гэта сапраўдная сага валунам і проста камяням — маўклівым сведкам нашай гісторыі. Аўтар пераконвае, што валуны, як і людзі, не падобны адзін на аднаго, кожны з іх — са сваім “норавам” і сваім “жыццём”. Асобныя старонкі ў кнізе адведзены одзе жорнам, без якіх раней нельга было спячы хлеб. Жорны “жылі” побач з чалавекам, рабілі яму ласку, былі карыснымі. Як і камяні, без якіх не абходзілася будаўніцтва ніводнай хаты.
Кніга, у якой 58 старонак, удала і прыгожа ілюстравана. Сам аўтар прызнаецца: кніжка далася нялёгка. Было аддадзена нямала часу, высілкаў і, вядома ж, любові. Каб чыталася, каб землякі, трымаючы ў руках кніжку, маглі парадавацца за новыя адкрыцці ў гісторыі роднага краю.
Рэдакцыя шчыра віншуе В. В. Улюценку з новым творчым набытках, зычыць даўняму і добраму сябру газеты пакарэння не менш пачэсных і ўдзячных вышынь у сваёй творчасці.
Мікалай ШОСТАК.
Надрукавана ў №50 ад 26.06.2012 г.
Среда, 4.12.2024
