Дроны пад забаронай
У Беларусі забаранілі фізічным асобам увозіць, захоўваць, эксплуатаваць беспілотнікі, а таксама займацца іх вытворчасцю. Адпаведны Указ № 297 «Аб дзяржаўным уліку і эксплуатацыі грамадзянскіх беспілотных лятальных апаратаў» кіраўнік дзяржавы Аляксандр Лукашэнка падпісаў 25 верасня бягучага года.
Цяпер здымаць прыгожыя вясковыя пейзажы, а таксама рабіць відэа дронам забаронена. Згодна са змяненнем у заканадаўстве прывозіць з іншых краін дроны, захоўваць і выкарыстоўваць беспілотнікі могуць толькі арганізацыі і індывідуальныя прадпрымальнікі ў рамках сваёй прафесійнай дзейнасці і з захаваннем патрабаванняў, прадугледжаных Указам, патлумачыў начальнік аддзялення аховы правапарадку і прафілактыкі РАУС Павел Трафімаў. Напрыклад, для ўвозу дронаў неабходна атрымаць дазвол у Дэпартаменце авіяцыі Міністэрства транспарту і камунікацый (яго спецыялісты вядуць улік беспілотных лятальных аб’ектаў).
Такое змяненне ў заканадаўстве накіравана на забеспячэнне грамадскай бяспекі і мае на мэце падлічыць колькасць беспілотных лятальных апаратаў і авіямадэляў, а таксама пракантраляваць іх выкарыстанне. Указ прадугледжвае стварэнне аўтаматызаванай інфармацыйнай сістэмы дзяржаўнага ўліку грамадзянскіх беспілотнікаў, якія належаць юрыдычным асобам або індывідуальным прадпрымальнікам.
Забарона на ўвоз, эксплуатацыю і выраб дронаў уступае ў сілу пасля афіцыйнай публікацыі Указа. Забарона на захоўванне – праз шэсць месяцаў. За гэты час фізічныя асобы павінны прадаць свае беспілотныя лятальныя аб’екты арганізацыям або індывідуальным прадпрымальнікам.
Ларыса КІСЯЛЁВА.
