Сёлета тэматычная брэндавая пляцоўка «Шуміліншчына – гасцінны край» на «Славянскім базары» адзначана дыпломам трэцяй ступені.
Прывабнасці дадала хлебная тэма, блізкая кожнаму беларусу, адзначылі яе арганізатары. Наш хлеб быў нарасхват. Шумілінцы яшчэ раз падкрэслілі спрадвечную ісціну: хлеб – усяму галава.
Так было спрадвеку – пра гэта нагадвалі дзежка, лапата, гаршчэчкі, чыгункі, якія так ці інакш выкарыстоўвалі пры замесе і выпечцы хлеба. Побач знаходзіліся конскія калёсы са снапамі, мяшкамі зерня і мукі. Падобную выставу работнікі Дома рамёстваў рабілі некалькі гадоў таму на форуме нацыянальных культур у Міёрах, вырашылі паказаць і ў Віцебску. І не прагадалі – ля шумілінскага падворка было многа цікаўных гледачоў.
«Выпякала хлеб перад “Славянскім базарам” тры дні, – раска-ала Вольга Загвоздава, член народнага клуба беларускай нацыянальнай кухні і фальклора «Разынка» і кіраўнік народнай студыі «Спадчына» Дома рамёстваў. – У электрычнай духавой шафе спякла 20 буханак. У Доме рамёстваў ёсць і рэцэпт рэгіянальнага шумілінскага хлеба, якім карыстаюся ўжо многа гадоў, і па традыцыі нашых бабуль пяку на кляновых і капусных лістах, на аеры. Плюс асвоіла яшчэ некалькі відаў хлеба – жытнёвых, пшанічных, грэцкіх. На нашай выставе-прэзентацыі ў цэнтры былі гатункі традыцыйнага ржанога хлеба, а таксама сучасныя: пшанічна-жытнёвы, хлеб з семкамі, кунжутам і часнаком, хлеб грэцкі, пшанічны цэльназерневы, ржаны цэльназерневы, хлеб дэсертны з мёдам, чарнаслівам і курагой».
На хлебным стале знаходзілася 9 гатункаў самапечанага хлеба. Вольга Загвоздава расказвала пра рэгіянальны шумілінскі, які нашы бабулі пяклі з жытняй мукі, дзялілася сакрэтамі яго выпечкі. Госці частаваліся хлебам і хвалілі яго за натуральны смак. Многія падыходзілі і прасілі прадаць шумілінскую буханку. Увесь шумілінскі хлеб раскупілі.
Вольга Загвоздава падзялілася і з нашымі чытачамі рэцэптам выпечкі пшанічна-жытнёвага хлеба: Трэба ўзяць:1 л цёплай вады, 0,5 кг пшанічнай мукі вышэйшага гатунку, 0,5 кг жытнёвай мукі абойнай або абдзірной, 1 ст. л. цукру, 1. ч. л. солі (з горкай), 25-30 г сырых дражджэй.Прыгатаванне.Дрожджы растварыць у цёплай (не гарачай!) вадзе разам з цукрам. Дадаць крыху пшанічнай мукі, размяшаць і ўсыпаць соль.
Па чарзе дадаваць жытнюю і пшанічную муку, пастаянна размешваючы. На гэтым этапе можна класці дабаўкі: кмен або семкі. Замяшаць у меру тугое цеста. Накрыць яго ручніком і пакінуць падыходзіць гадзіны на дзве. Раздзяліць падышоўшае цеста на дзве часці мокрымі рукамі. Выпякаць у форме на працягу гадзіны пры тэмпературы 160-180 градусаў. Важна! Сакрэт добрага цеста для пышнага хлеба – стараннае вымешванне. Вымешваць цеста трэба на працягу 15 хвілін.
Ларыса ЗАЙЦАВА.
