Рыхтуецца стаць механізатарам
Лета для падлеткаў — не толькі час адпачынку, але і магчымасць папрацаваць, зарабіць грошай на кішэнныя расходы. І калі кіраўніцтва ААТ «АграБаравінка» прапанавала працоўныя месцы на мехдвары, Глеб Вясна з Башнёў ахвотна згадзіўся.
Падчас нашага прыезду хлопец працаваў ля грабляў з гаечнымі ключамі ў руках. «Іх механізатары нядаўна адрамантавалі, а мне даверылі праверыць кожную гайку і падкруціць пры неабходнасці, — усміхнуўся Глеб. — Я закончыў восем класаў і ўпершыню ўладкаваўся на работу, бо бяруць толькі з чатырнаццаці гадоў. Кіраўніцтва гаспадаркі прапаноўвала тры рабочыя месцы для школьнікаў, а прыйшоў толькі я адзін. Мне падабаецца працаваць разам са сталымі мужчынамі.
У многім ім дапамагаю, падношу інструменты, калі яны рамантуюць, падмятаю, прыбіраю. Быў памочнікам і ў свайго бацькі, які працуе ў гаспадарцы механізатарам: дапамагаў рамантаваць трактар. Планую працаваць на мехдвары два месяцы. Праз год збіраюся пайсці вучыцца на механізатара ў Гарадок. Заробленыя грошы патрачу на пакупку веласіпеда».
Начальнік участка Аляксандра Міраненка пахваліла Глеба за стараннасць. Паколькі на мехдвары не стае слесараў, лішнія працоўныя рукі заўсёды патрэбныя.
Ларыса ЗАЙЦАВА.
