Адзінаццацікласнікі Шумілінскай СШ №1 пабывалі на экскурсіі ў раённым аддзеле Следчага камітэта Рэспублікі Беларусь. У ролі экскурсавода выступіў намеснік начальніка аддзела Віталь Ішчук.
«Пра прафесію следчага вы ведаеце з кінафільмаў. Ім можа стаць дапытлівы і камунікабельны чалавек, які здольны праз некалькі хвілін гутаркі зрабіць даверлівую і зацікаўленую атмасферу, – адзначыў намеснік начальніка. – Гэта вельмі цікавая, але складаная прафесія. Вы толькі ўявіце, што следчаму па маленькіх крупінах прыходзіцца аднаўляць падзеі, шукаць і знаходзіць ісціну».
Віталь Ішчук паказаў крымінальную справу пра забойства, якое было здзейснена ў 1999 годзе, расказаў, як вялося следства і па якіх доказах быў устаноўлены забойца.
Цікаўнасць у адзінаццацікласнікаў выклікаў чамадан эксперта-крыміналіста і яго магчымасці. Следчыя аддзела паказалі, як знаходзяцца сляды злачынства, так званыя «пальчыкі».
Атрымаць прафесію можна на следча-экспертным факультэце Акадэміі МУС. «Для паступлення трэба звярнуцца да нас ў райаддзел для накіравання, паспяхова закончыць школу, здаць іспыты па беларускай ці рускай мовах, грамадствазнаўстве і замежнай мове, – падкрэсліў Віталь Васільевіч. – У вас ёсць яшчэ час вызначыцца, бо накіраванне можна ўзяць да 15 красавіка».
Аляксандр ШЭДЗЬКО.
