На прыём – у абноўленую паліклініку
21 снежня пасля рамонту ўрачыста адкрылі паліклініку Шумілінскай цэнтральнай раённай бальніцы
Выступаючы на цырымоніі адкрыцця, старшыня раённага выканаўчага камітэта Сяргей Галынчык падкрэсліў, што сённяшні час паказаў, як важна аказанне якаснай медыцынскай дапамогі, і адрамантаваная паліклініка – добры падарунак усім жыхарам раёна ў Год народнага адзінства, тым больш напярэдадні Новага года.
Кіраўнік раёна адзначыў, што на рамонт было выдаткавана больш за мільён рублёў, 177 тысяч – на набыццё медыцынскага абсталявання, 185 тысяч – на рамонт ліфтаў. Сяргей Аляксандравіч пажадаў медыкам плённай работы і поспехаў у справе.
Начальнік галоўнага ўпраўлення аховы здароўя аблвыканкама Міхаіл Вішнявецкі падзякаваў работнікам установы за цярпенне, падкрэсліўшы іх уклад у рамонт паліклінікі, праз якую праходзіць большасць жыхароў раёна. Ён адзначыў, што атрымалася прыгожая сучасная паліклініка, у якой будзе зручна пацыентам і медыкам.
Галоўны ўрач Шумілінскай ЦРБ Святлана Лінкевіч падзякавала будаўнікам за работу, кіраўніцтву раёна і вобласці – за падтрымку і выдзяленне сродкаў на развіццё устаноў аховы здароўя.
Напярэдадні Новага года завітаў у паліклініку і Дзед Мароз са Снягуркай, каб пажадаць медыкам плённай работы і выдаць ім сертыфікат на ўвесь 2022 год на здароўе, радасць, шчасце і іншыя пазітыўныя эмоцыі.
Святлана Лінкевіч правяла гасцей па абноўленай паліклініцы, у якой з’явіўся сучасны зубапратэзны кабінет, кабінеты функцыянальнай дыягностыкі, лабараторыя. Абсталяваны асобны пакой адпачынку і прыёму ежы для работнікаў паліклінікі.
Паэтапны рамонт цэнтральнай бальніцы дазволіў абнаўляць медыцынскую ўстанову паралельна з аказаннем медыцынскіх паслуг. У абноўленай паліклініцы змяніўся не толькі знешні выгляд кабінетаў і калідораў, якія сталі светлымі і, здаецца, больш прасторнымі, са зручнымі крэсламі, новай мэбляй. У ходзе рамонту былі ўлічаны і патрабаванні да работы медустановы падчас пандэміі, створаны дадатковыя ўмовы для большай бяспекі пацыентаў і медыкаў. У медыцынскай установе з’явілася і новае абсталяванне, якое дазволіць аказваць медыцынскія паслугі на ўзроўні, не горшым за сталічныя клінікі. Закуплены і ўжо працуе відэагастраэндаскоп. Зманціравана новая сістэма відэаназірання і пажарнай аховы. Усталяваныя дадатковыя кіслародныя кропкі, што асабліва важна для пацыентаў з каранавіруснай інфекцыяй. Для рэанімацыйнага аддзялення набылі медыцынскі манітор, інфузійныя шпрыцавыя помпы, камп’ютары. Усё гэта дазволіць аказваць жыхарам раёна медыцынскую дапамогу на высокім узроўні.
Сяргей ЕРМАЛАЕЎ.
Апублікавана ў №100 ад 24.12.2021 г.
