Убраць вырашчанае, закласці аснову пад будучы ўраджай
Чарговае пасяджэнне раённага выканаўчага камітэта пад кіраўніцтвам старшыні райвыканкама Віктара Гутарава адбылося 23 ліпеня. У пасяджэнні брала ўдзел дэпутат Палаты прадстаўнікоў Нацыянальнага сходу Рэспублікі Беларусь Ірына Палякова.
Жніво
Самае актуальнае пытанне, якое вынесена на парадак дня, – уборка ўраджаю і сяўба азімых пад ураджай наступнага года. «Жніво ўжо ідзе поўным ходам, і гаспадаркі раёна ўзялі добрыя тэмпы. Захаваць гэтыя тэмпы, мабілізаваць усе тэхнічныя і чалавечыя рэсурсы, хутка і якасна сабраць вырашчаны ўраджай – галоўная задача. Пры гэтым трэба весці нарыхтоўку кармоў і рыхтаваць глебу для сяўбы азімых пад ураджай 2022 года», – адзначыў старшыня райвыканкама. Ён звярнуўся да кіраўнікоў гарадскіх арганізацый, каб яны тэрмінова, хто яшчэ не зрабіў гэтага, накіравалі механізатараў і вадзіцеляў у сельскагаспадарчыя арганізацыі. Уборачная – агульная справа, падкрэсліў ён.
Сельгасарганізацыям Шуміліншчыны трэба выканаць заданне па вытворчасці збожжа – 24,7 тысячы тон, насення рапсу – 2,4 тысячы тон. Па дзяржзаказе неабходна паставіць 3050 тон зерня.
Для ўборкі 10881 гектара зерневых і 2438 гектараў крыжакветных плануецца задзейнічаць 40 камбайнаў. Надвор’е спрыяе ходу жніва, збожжа паступае нізкай вільготнасці, што дазваляе эканоміць на сушцы. Але трэба спяшацца, бо сітуацыя ў любы момант можа змяніцца.
Разам з уборкай трэба весці работы па сяўбе азімых культур. Заданне напружанае – 11,5 тысячы га. Ад якасці і тэмпаў работы залежыць ураджай наступнага года.
«Зялёнае золата» Шуміліншчыны
Багаццем Шумілінскага раёна з’яўляюцца лясы. Іх эфектыўнае і рацыянальнае выкарыстанне і перапрацоўка складае важкую частку эканомікі раёна. Шумілінскі лясгас ператварыўся ў адно з буйных прадпрыемстваў раёна, якое паспяхова развіваецца, стварае новыя працоўныя месцы. У гэтых умовах важна не толькі эфектыўна выкарыстоўваць спелыя лясы, але і займацца лесааднаўленнем, заўважыў, пачынаючы абмеркаванне другога пытання парадку дня, кіраўнік раёна Віктар Гутараў.
Дырэктар Шумілінскага лясгаса Аляксандр Лабынцаў выступіў са справаздачай аб рэалізацыі Дзяржаўнай праграмы «Лясы Беларусі» на 2016-2020 гады.
За перыяд дзеяння праграмы за кошт перадачы зямельных участкаў, якія зараслі драўнінна-хмызняковай расліннасцю, агульная плошча ляснога фонду павялічылася на 1855 га і склала 80,6 тысячы га, плошча пакрытых лесам зямель вырасла да 69,2 тысячы га. За пяць год доля спелых і перастойных насаджэнняў павялічылася на 10% і складае 21,7%.
Штогадовы аб’ём драўніны, які можна нарыхтоўваць, складае 190,4 тыс. кубаметраў, за перыяд дзеяння праграмы агульны аб’ём нарыхтоўкі драўніны вырас з 128,4 тыс. да 158,9 тыс. кубаметраў. Аб’ёмы лесанарыхтоўкі не выконваюцца з-за цяжкадаступнасці лесасек у раёне, сказаў кіраўнік лясгаса.
З мэтай павышэння даступнасці лясных масіваў за мінулую пяцігодку пабудаваны 19,4 кіламетра лясных дарог. Плануецца іх будаўніцтва і ў бягучую пяцігодку. Гэта дазволіць паўней выкарыстоўваць лясныя багацці раёна, адзначыў Аляксандр Лабынцаў.
Прадпрыемства вядзе поўны комплекс работ па павышэнні эфектыўнасці лесавыкарыстання, ахове лясоў раёна. З мэтай рацыянальнага выкарыстання лясных зямель, аптымізацыі насаджэнняў праведзена лесааднаўленне і лесаразвядзенне на плошчы 687 га. З 2016 года сярэдні запас лясных наса-джэнняў вырас на 7 кубаметраў і склаў 206 кубаметраў на 1 га, запас спелых і перастойных насаджэнняў вырас на 23 кубаметры – да 276 куб. м на 1 га.
У рамках рэалізацыі праграмы праведзена мадэрнізацыя – набыта спецыялізаваная тэхніка на суму 1,9 мільёна рублёў, што дазволіла забяспечыць нарфыхтоўку 22,4% драўніны механізаваным спосабам.
Прадпрыемства ў 2020 годзе купіла і ўсталявала лесапільную лінію, якая дазволіла арганізаваць перапрацоўку драўніны ўласнымі сіламі.
За пяць год сярэдняспісачная колькасць работнікаў павялічылася на 17 чалавек і зараз складае 263 чалавекі.
Адбылося зацікаўленае абмеркаванне перспектыў развіцця арганізацыі і павышэння эфектыўнасці яго работы.
Пытанні ЖКГ
З інфармацыяй аб рабоце са зваротамі грамадзян і юрыдычных асоб па пытаннях жыллёва-камунальнай гаспадаркі выступіла загадчык сектара па рабоце са зваротамі грамадзян Вольга Баранава. Пытанні жыллёва-камунальнай гаспадаркі застаюцца асноўнымі ў агульнай колькасці зваротаў у органы ўлады і складаюць да 38%. Дакладчык прадставіў падрабязны аналіз зваротаў, іх вырашэнне. Справаздачу трымалі дырэктар УП ЖКГ Аляксей Шпакаў і дырэктар УКВП «Віцебская жыллёва-камунальная гаспадарка» Сяргей Пуцілоўскі.
Віткар Гутараў падкрэсліў, што вялікая колькасць зваротаў сведчыць пра недастатковую работу арганізацый ЖКГ па вырашэнні праблемных пытанняў, пра нізкую якасць работы, адсутнасць кантролю за выканаўцамі з боку спецыялістаў і кіраўніцтва. Сфера ЖКГ непасрэдна тычыцца кожнага чалавека, і ўзровень работы ў ёй павінен быць найвышэйшы. Трэба працаваць на апераджэнне праблем, а не чакаць, калі цярпенне людзей скончыцца і пачнуцца скаргі, заўважыў кіраўнік раёна.
Па абмеркаваных пытаннях прыняты рашэнні, якія будуць дапрацаваны з улікам выказаных прапаноў і заўваг.
Сяргей ЕРМАЛАЕЎ.
Апублікавана ў №57 ад 27.07.2021 г.
