Будзь чыстым, лес!
Рэспубліканская добраахвотная акцыя «Чысты лес» прайшла ў мінулыя выхадныя па ўсёй краіне, у тым ліку і на Шуміліншчыне
Добраахвотная акцыя «Чысты лес» ініцыяваная Міністэрствам лясной гаспадаркі і ладзілася ў нашай краіне ў дзясяты раз. Кампанія па навядзенні парадку сёлета прымеркавана да Года малой радзімы і мела на мэце дапамагчы лясгасам ліквідаваць несанкцыянаваныя звалкі будаўнічых і бытавых адходаў, смецце ў лясах, якія прымыкаюць да аўтамабільных дарог і чыгунак, вакол населеных пунктаў, у месцах масавага адпачынку.
Акцыю ў нашым раёне падтрымалі работнікі лясгаса, Казьянскага, Обальскага і Мікалаеўскага лясніцтваў, вучні Шумілінскай СШ №2 і Мішневіцкай школы, раённая інспекцыя прыродных рэсурсаў і аховы навакольнага асяроддзя.
Удзельнікі акцыі, узброіўшыся пальчаткамі і смеццевымі мяшкамі, у першую чаргу займаліся добраўпарадкаваннем месцаў масавага адпачынку грамадзян і прыдарожных палос.
Восень – вельмі спрыяльны час для пасадак лясных культур. Таму лесаводы Шуміліншчыны выкарысталі акцыю для гэтай высакароднай справы. Па падліках намесніка дырэктара па ідэалагічнай рабоце Шумілінскага лясгаса Людмілы Доктаравай, леснікамі сумесна з валанцёрамі было высаджана ў мінулую суботу 6,5 тысячы штук саджанцаў елкі еўрапейскай і 1 тысяча штук бярозы.
Алена КАРПУШЭНКА.
Апублікавана ў №83 ад 23.10.2020 г.
