Гатовы прыйсці на дапамогу
У рамках рэспубліканскай акцыі «Моладзь – за бяспеку!» работнікі раённага аддзела па надзвычайных сітуацыях разам з актывістамі Беларускай маладзёжнай грамадскай арганізацыі ратавальнікаў-пажарных аказвалі пасільную шэфскую дапамогу адзінокім пенсіянерам, ветэранам працы, мнагадзетным сем’ям.
Так, вучні Шумілінскай СШ №2 адправіліся на дапамогу да адзінокіх пенсіянераў пасёлка і дапамаглі ва ўборцы домаўладанняў, прысядзібных участкаў ад смецця. Юныя валанцёры пераносілі і складвалі дровы, перакопвалі градкі. Па заканчэнні работ яны ўручалі памяткі «Неапалімая купіна» і размяшчалі наклейкі на дзверы і брамкі, якія сведчылі пра тое, што тут была аказана дапамога ў рамках акцыі «Моладзь – за бяспеку!».
Старанні дзяцей не пакінулі раўнадушнымі пенсіянераў, на развітанне памочнікі чулі ад падшэфных словы ўдзячнасці за клопат.
Алена КАРПУШЭНКА.
Надрукавана ў №83 ад 22.10.2019 г.
