Уклонисты. Найди свою фамилию…

Ухіліст
Артыкул 57 Канстытуцыі Рэспублікі Беларусь вызначае, што “абарона Рэспублікі Беларусь – абавязак і свяшчэнны доўг грамадзяніна Рэспублікі Беларусь”. Але служыць у арміі хочуць не ўсе. Замест таго, каб  праходзіць ваенную службу, загартоўваць характар, набываць ваенныя навыкі і армейскіх сяброў некаторыя маладыя людзі імкнуцца любымі спосабамі пазбегнуць прызыву, ухіліцца ад арміі. Нават ведаючы пра адказнасць за гэта.
Ведаў пра гэта і 26-гадовы жыхар Л.  з райцэнтра, якому яшчэ ў лютым, асабіста ў рукі і пад роспіс, уручылі павестку ў ваенкамат. Але для праходжання медыцынскай камісіі, якая вызначае прыгоднасць да ваеннай службы, малады чалавек так і не з’явіўся. Гэтым самым парушыў закон і запісаў сябе ва “ўхілісты”.
Як высветлілася, у грамадзяніна Л. гэта не першае парушэнне – ён і раней прыцягваўся да адміністрацыйнай адказнасці за парушэнне воінскага ўліку. А нядаўна за ўхіленне ад арміі на яго ўзбудзілі крымінальную справу. Днямі адбыўся суд.
На пытанне суддзі суда Шумілінскага раёна Кацярыны Унуковіч, чаму не з’явіўся ў суд па павестцы, малады чалавек тлумачыў, што ён з’яўляецца індывідуальным прадпрымальнікам, што якраз у той час, калі трэба было ісці ў ваенкамат, з’явілася многа заказаў ад кліентаў, ад якіх “нельга было адмовіцца”. Але ж кожны разумее, што на час вайсковай службы прыйдзецца адкласці ў бок ўсе іншыя справы, таму гэтае тлумачэнне ніякім чынам не апраўдвае грамадзяніна і не вызваляе яго ад адказнасці.
Выслухаўшы тлумачэнні ўхіліста, паказанні сведкаў, довады намесніка пракурора Шумілінскага раёна Андрэя Дзергачова і начальніка адасобленай групы Шумілінскага раёна ваеннага камісарыята Бешанковіцкага і Шумілінскага раёнаў Андрэя Собіна, суддзя кіравалася ч. 1 арт. 435 Крымінальнага кодэкса Рэспублікі Беларусь “Ухіленне ад мерапрыемстваў прызыву на ваенную службу”. Грамадзянін Л. прыцягнуты да адказнасці ў выглядзе штрафу памерам у 60 базавых велічынь (1380 рублёў). Калі малады чалавек не выплаціць штраф, яму пагражае арышт да трох месяцаў.
Дарэчы, выплата штрафу не вызваляе ад воінскага абавязку. Праз некаторы час малады чалавек зноў атрымае павестку ў ваенкамат.
Людміла ЗУЙКОВА.

У адпаведнасці з указам Прэзідэнта Рэспублікі Беларусь ад 27 ліпеня 2017 года № 261 “Аб звальненні ў запас і прызыве на тэрміновую ваенную службу, службу ў рэзерве” праводзяцца мерапрыемствы прызыву грамадзян на тэрміновую ваенную службу, службу ў рэзерве.
Большасць маладых людзей прайшла медыцынскую камісію і пасля прафесійнага псіхалагічнага адбору будуць гатовы ў лістападзе адбыць у воінскія часці для праходжання службы. Аднак знайшліся і такія хлопцы, якія, нават атрымаўшы павестку з ваеннага камісарыяту пад роспіс, дазволілі сабе без паважлівай прычыны не з’явіцца на мерапрыемствы прызыву – гэта Міронаў Кірыл Вітальевіч з а.-г. Светласельскі і Міхайлаў Максім Сяргеевіч з г. п. Шуміліна.
Хочацца нагадаць гэтым грамадзянам, што ў адпаведнасці з арт. 435 Крымінальнага кодэкса Рэспублікі Беларусь за ўхіленне ад мерапрыемстваў прызыву на ваенную службу прадугледжаны штраф або арышт да 6 месяцаў, або абмежаванне волі да двух гадоў, або пазбаўленне волі на той жа тэрмін. Ухіленне ад арміі не вартае таго, каб ламаць сабе жыццё.
У раённай газеце была надрукавана  выпіска з рашэння раённага выканаўчага камітэта “Аб правя-дзенні ў Шумілінскім раёне прызыву грамадзян 1990-1999 гадоў нараджэння на тэрміновую ваенную службу, службу ў рэзерв”, дзе ўказана пра неабходнасць  самастойнай яўцы ў ваенны камісарыят прызыўнікам, якія страцілі права на адтэрміноўку ад прызыву і не атрымалі персанальную павестку. Доўгі час некаторым прызыў-нікам не ўдаецца ўручыць павесткі, сярод іх:
Жыжоў Уладзіслаў Сяргеевіч,
Тарасенка  Ілья Сяргеевіч,
Фядзьковіч Валерый Валер’евіч,
Філюхоў Антон Сяргеевіч,
Чаранок Уладзіслаў Уладзіміравіч,
Штарас Эдуард Эдвардасавіч,
Пракопаў Валерый Вячаслававіч,
Іваніцкі Кірыл Вітальевіч,
Мамойка Сяргей Алегавіч,
Рыбкін Дзяніс Уладзіміравіч,
Рыбкін Андрэй Уладзіміравіч,
Пазднякоў Дзяніс Сяргеевіч,
Сухоцкі Іван Віктаравіч,
Аляксееў Уладзіслаў Ігаравіч.
Названым прызыўнікам неабходна прыбыць у адасобленую групу (Шумілінскага раёна) ваеннага камісарыята Бешанковіцкага і Шумілінскага раёнаў па адрасе: г. п. Шуміліна, вул. Вакзальная, д. 3.
Андрэй СОБІН,  начальнік адасобленай групы (Шумілінскага раёна) ваеннага камісарыята
Бешанковіцкага і Шумілінскага раёнаў.

Надрукавана ў №71 ад 12.09.2017 г.