Сыр плача – майстар скача
За мінулы год работнікі Шумілінскага вытворчага цэха ААТ “Малако” перапрацавалі 15482 тоны сыравіны, зрабілі 2137 тон сыроў розных гатункаў (у 2015 годзе было 1466 тон), падлічылі эканамісты прадпрыемства. Усяго шумілінскія сыраробы вырабілі прадукцыі на 15866 рублёў (у 2015 годзе – на 10514 рублёў).
Для рытмічнай работы вытворчага цэха, дзе сёння працуюць каля 140 чалавек, патрэбна на дзень сто тон малака. На жаль, сельгаспрадпрыемствы нашага раёна не могуць забяспечыць такой колькасцю сыравіны. Таму палову патрэбнага малака ў Шуміліна дастаўляюць з галаўнога прадпрыемства, што знаходзіцца ў Віцебску.
“Усё малако, што паступае ў цэх, праходзіць стопрацэнтны дэталёвы кантроль, – кажа начальнік цэха Валянціна Пісьменная.– Так што сыры робяць толькі з якаснай сыравіны. Затое мы з упэўненасцю можам сказаць, што наш пакупнік атрымае выдатны, якасны прадукт”.
Тыя 23 віды сыроў, што сёння вырабляюцца ў вытворчым цэху, карыстаюцца попытам не толькі ў гандлёвых кропках нашай рэспублікі, але і за мяжой – у першую чаргу ў Расійскай Федэрацыі, са спажыўцамі якіх ААТ “Малако” супрацоўнічае не адзін год. “Козыр” шумілінскіх сыраробаў – натуральнасць і бяспечнасць прадукцыі, добрыя смакавыя ўласцівасці, прыгожая і зручная ўпакоўка. Дзякуючы гэтаму і іншым маркетынгавым “хадам”, якія спецыялісты трымаюць у сакрэце, цвёрдым крокам ідуць на намечанай стратэгіі – да ўваходжання ў новыя буйныя гандлёвыя сеткі.
Мінулы год для ААТ “Малако” стаў годам новых сыроў. У прыватнасці, два з іх – “грувер” і “пармезан дэлюкс” – вырабілі ў Шуміліне. Асабліва нашы землякі-сыраробы задаволены “пармезанам”, які не саступае еўрапейскім гатункам. Праўда, спецыялісты доўга вывучалі вопыт і тэхналогію вытворчасці, прыстасоўвалі смакавыя якасці сорту да ўжо папулярных у пакупнікоў.
“Пармезан дэлюкс” – цвёрды сыр. Вядома, ён адрозніваецца ад усіх іншых паўцвёрдых гатункаў, што мы вырабляем, – кажа тэхнолаг Шумілінскага вытворчага цэха Ларыса Пракопчык. – Пры вырабе выкарыстоўваем спецыяльныя закваскі, выспявае сыр доўгія тры месяцы. Калі ўсе гатункі паўцвёрдых сыроў выпускаюцца ў палімерных плёнках, то пармезан – у поліацэтатным латэксным пакрыцці, які наносіцца ўручную. Гэта нялёгкі і марудны працэс, але пакуль па-іншаму ніяк, бо згубяцца вытанчаныя смакавыя ўласцівасці. Спажыўцы цэняць “пармезан дэлюкс” за яго саладкавата-садавінны водар, за выключны смак, які нагадвае ананас. Гэты сыр разыходзіцца не толькі ў гурманаў кавы, але і выкарыстоўваецца для прыгатавання розных страў: супоў, соусаў, салатаў”.
Дарэчы, старанні шумілінскіх сыраробаў у гэтым годзе былі высока ацэнены на Міжнароднай выставе прадуктаў харчавання “Прадэкспа”, якая прайшла ў Маскве. У намінацыі “Лепшы інавацыйны прадукт” за сыр “пармезан дэлюкс” атрымалі дыплом першай ступені. А гатунак “гауда-гранд” прынёс бронзавы медаль у намінацыі “Лепшы прадукт года”.
Як расказалі спецыялісты вытворчага цэха, сёлета яны мяркуюць вырабляць тыя ж гатункі сыроў, што і летась. Праўда, многія з іх будуць удасканальваць па смакавых асаблівасцях. Для гэтай мэты створана дэгустацыйная камісія на чале з начальнікам цэха, у якую ўваходзяць майстры, тэхнолагі, спецыялісты лабараторыі. Цікава, што гатовы сыр яны заўсёды надразаюць, глядзяць на яго малюнак і на “вочкі”. Калі апошнія блішчаць, быццам бы там слязінка, значыць, сыр удаўся на славу. Не дарэмна ж сыраробы кажуць: “Сыр плача – майстар скача”.
Шумілінскія сыраробы і надалей нацэлены трымаць марку сваёй прадукцыі і трывала замацоўваць яе на рынку. Мараць пра рэканструкцыю на прадпрыемстве, каб можна было вырабляць “сыр з дзіркамі” накшталт гатунку “манарх”.
Ларыса ЗАЙЦАВА.
Надрукавана ў №31 ад 18.04.2017 г.
