Пра што пісала ў 1973 годзе «Герой працы?»

Пра што пісала ў 1973 годзе «Герой працы?»

Трынаццатая зарплата
Плённа папрацаваў летась калектыў Дабееўскага спецаддзялення “Сельгас-тэхніка”. За якаснае выкананне ўсіх вытворчых паказчыкаў тут налічана “трынаццатая зарплата”. Многія атрымалі значныя сумы. Напрыклад, трактарыст М. Т. Кузняцоў – 172, шафёр О. І. Дрыбко – 169, трактарыст Г. Я. Сувораў – 147 рублёў. Усяго на “трынаццатую зарплату” выдаткавана 7200 рублёў.
Добрая прыбаўка ў сямейны бюджэт!
Т. АРТАМОНАВА.

Будуецца сыраробчы завод
Непадалёк ад вінзавода, на месцы былой сянной базы, раскінулася будаўнічая пляцоўка. Працуе землярыйная тэхніка, з дапамогай рулетак і тэадаліта робяцца вымярэнні…
Тут будзе новы сыраробчы завод.
Сёлета на будаўніцтве завода падрадным арганізацыям ПМК-120 і ПМК-126 прадстаіць асвоіць 500 тысяч рублёў. Робяцца пад’язныя шляхі, пракладваецца дрэнаж, зносяцца старыя пабудовы. Распачаты ўжо і работы па нулявому цыклу галоўнага корпуса.
Новы завод толькі нараджаецца. Першую прадукцыю ён выдасць  не раней чым праз тры гады. Але яго адрас ужо вядомы. Па чыгунцы прыбываюць і прыбываюць для завода грузы – тэхналагічнае абсталяванне.
Р. ГАЛЬПЕРЫН.

Бывай, зіма!
На традыцыйнае свята зімы ў Лескавічы сабраліся сельскія працаўнікі калгасаў імя Леніна, “Правда”, імя Энгельса, рабочыя і служачыя з райаб’яднання і Дабееўскага спецаддзялення “Сельгастэхніка”, ПМК-25, торфапрадпрыемства “Дабееўскі мох”, масласырзавода і іншых прадпрыемстваў і ўстаноў Шуміліна.
Прывітальным словам свята адкрыў старшыня выканкома Лескавіцкага сельскага Савета П. А. Ерашоў. Ганаровае права ўзняць святочны сцяг прадастаўляецца старэйшаму калгасніку імя Леніна Ц. П. Шмэркіну і перадавой даярцы з гэтай жа гаспадаркі М. К. Лях. Урачыста гучыць Гімн Савецкага Саюза. Горда лунаюць сцягі ўсіх саюзных рэспублік.
Пад віншавальныя гукі туша і дружныя воплескі ўсіх прысутных шматлікім перадавікам вытворчасці ўручаюцца каштоўныя падарункі. Лепшых працаўнікоў сяла і райцэнтра вітаюць з эстраднай сцэны лескавіцкага парка самадзейныя артысты РДК.
Затым у надазёрным парку пачаліся гульні, атракцыёны, лыжныя спаборніцтвы.
Ф. МІКАЛАЕЎ.

Ігнаруюць важны рэзерв
За першае паўгоддзе мінулага года саўгас “Лаўжанскі” закупіў у насельніцтва 303 свінні. У бягучым годзе – ніводнай.
Па некалькі дзесяткаў вепрукоў і свінак былі куплены летась у насельніцтва і пастаўлена на адкорм і калгасамі імя Леніна, імя Мічурына. Сёлета ж тут таксама, відавочна, вырашылі адмовіцца ад гэтага рэзерву павелічэння вытворчасці і рэалізацыі мяса, бо не закупілі яшчэ ніводнай жывёліны. Між тым планы трэцяга года пяцігодкі вельмі напружаныя. І каб выканаць іх, трэба спаўна выкарыстоўваць усе магчымасці для расшырэння вытворчасці і нарыхтовак мяса.
П. РЭДЗЬКІН.

Спаборнічаюць стралкі
Нядаўна ў саўгасе імя Кароткіна прайшлі спаборніцтвы па кулявой стральбе з дробнакалібернай вінтоўкі па здачы норм ГПА.
Лепшыя вынікі ў ходзе спаборніцтва паказалі механізатары У. М. Акунёў, П. Д. Чарнічэнка, электрык Л. Л. Акунёў, начальнік механізаванага атрада С. Е. Селязнёў, дырэктар Чырвонаюраўскай васьмігадовай школы Т. А. Дабравольская, галоўны інжынер саўгаса А. С. Дабравольскі.
Паспяхова прайшлі спаборніцтвы па стральбе таксама на заводзе торфаізаляцыйных вырабаў імя Даўмана і ў Даўманскай сярэдняй школе.
І. БАГАЦЁНАК, старшыня раённага камітэта ДТСААФ.

У партыю Леніна
Зацверджаны рашэнні пярвічных партарганізацый аб прыёме кандыдатамі ў члены КПСС: В. М. Казлова – трактарыста калгаса імя Суворава, М. П. Медзікава – трактарыста калгаса імя Урыцкага, А. П. Сідарэнкі – намесніка начальніка мехатрада саўгаса “Казьяны”, В. В. Дударава – аўтакранаўшчыка Обальскага цагельнага завода, М. В. Васільева – шафёра саўгаса “Сіроцінскі”.

Шумілінскі камбінат камунальных прадпрыемстваў даводзіць да ведама
жыхароў г. п. Шуміліна, што паліванне гародаў з водаразборных калонак у дні работы лазні (чацвер, пятніцу і суботу) дазваляецца толькі з 22 гадзін.
Грамадзяне, якія парушаюць устаноўлены парадак, будуць прыцягвацца да адміністрацыйнай адказнасці.
АДМІНІСТРАЦЫЯ.
Падшыўкі гартала Аліна ПЯТРОВА.
Надрукавана ў №4 ад 13.01.2017 г.