На заседании Шумилинского райисполкома

“Дачаснікі добра працаваць не будуць”
На парадак дня пасяджэння райвыканкама былі вынесены розныя, на першы погляд, пытанні: выкананне зямельнага заканадаўства, замацаванне маладых спецыялістаў, прафілактыка і раскрыццё злачынстваў, корманарыхтоўка. Але ва ўступным слове да кожнага з гэтых пытанняў старшыня райвыканкама У. П. Куранны знайшоў яднаючы фактар – чалавечы. Менавіта людзі працуюць на зямлі, ставяцца да яе беражліва ці наадварот. Менавіта людзі здзяйсняюць і раскрываюць злачынствы, кожны чалавек можа папярэдзіць і спыніць правапарушэнне. Менавіта людзі працуюць на нарыхтоўцы кармоў, і ад таго, як яны спрацуюць, залежыць колькасць і якасць прадукцыі. “Найміт, дачаснік, работнік на час добра працаваць не будуць. Яны не думаюць пра будучыню, для іх абы час прайшоў, – падкрэсліў  кіраўнік раёна. – Таму трэба працаваць на тое, каб маладыя спецыялісты, моладзь наогул заставаліся на Шумілінскай зямлі, каб яны прырасталі да раёна душой, сям’ёй. Каб вярталіся на радзіму шумілінцы, каб заставалася моладзь з іншых рэгіёнаў. Інакш у шумілінскай зямлі не будзе будучыні”.
Начальнік землеўпарадкавальнай службы райвыканкама З. Ф. Алюліна падрабязна расказала пра работу, якая праводзіцца па захаванні зямельнага заканадаўства і кантролі за выкарыстаннем і аховай зямлі.
За апошнія гады ў раёне праведзена значная работа па ўцягванні ў гаспадарчы абарот зямель, якія не выкарыстоўваліся ці выкарыстоўваліся неэфектыўна. Зафія Францаўна адзначыла і недахопы, якія яшчэ існуюць у  названай рабоце, паведаміла пра меры, што прымаюцца да парушальнікаў зямельнага заканадаўства.
“Кіраўнік дзяржавы адзначыў, што зямля – гэта багацце краіны, і да яе павінна быць адпаведнае стаўленне, – падкрэсліў У. П. Куранны. – Да парушальнікаў, да нядбайных гаспадароў трэба прымаць самыя жорсткія меры. Падчас падворных абходаў трэба патрабаваць ад людзей безумоўнага навядзення парадку ў населеных пунктах, на зямельных участках”.
З дакладам аб замацаванні маладых спецыялістаў выступіў начальнік аддзела арганізацыйна-кадравай работы райвыканкама В. А. Емяльянаў, які расказаў пра работу раённых уладаў, кіраўніцтва асобных прадпрыемстваў з маладымі спецыялістамі, якія прыходзяць у наш раён. Штогод праводзяцца сустрэчы кіраўніцтва раёна з маладымі спецыялістамі. Так, за апошнія чатыры гады для маладых медыкаў раённыя ўлады выдзелілі 6 кватэр. Жыллё выдзяляецца і ў іншых арганізацыях раёна. Зарплата маладых спецыялістаў знаходзіцца ў дыяпазоне ад 5,6 мільёна рублёў ва ўрачоў да 2,5 мільёна – у работнікаў культуры.
Але падаўляючая большасць моладзі імкнецца з’ехаць пасля адпрацоўкі  па размеркаванні. Апытанне паказвае, што большасць не задавальняе нізкая зарплата, адсутнасць магчымасцяў для кар’ернага росту, узровень інфраструктуры і абмежаваныя ўмовы для развіцця дзяцей, асабліва на вёсцы. Над рашэннем гэтых праблем трэба працаваць усім, шукаць магчымасці падтрымаць моладзь.
“Працаваць трэба пачынаць са школы: не з выпускных класаў, а раней. Кожны кіраўнік прадпрыемства павінен бываць у школах пастаянна, падбіраць для сябе будучыя кадры, накіроўваць іх, рыхтаваць для свайго прадпрыемства, – заўважыў  старшыня райвыканкама. – Наш, шумілінскі малады чалавек ці дзяўчына, з большым жаданнем вернуцца на радзіму, да бацькоў, з большай верагоднасцю застануцца тут працаваць”.
Па сітуацыі з прафілактыкай правапарушэнняў і аператыўным раскрыцці злачынстваў далажыў начальнік РАУС А. Р. Дзмітрэнка. У раёне ёсць пэўныя зрухі, але сітуацыя застаецца напружанай. Супрацоўнікі міліцыі працуюць на ўсіх накірунках па прафілактыцы правапарушэнняў і на паляпшэнне крымінальнай сітуацыі ў раёне.
Як падкрэсліў У. П. Куранны, са злачынствамі неабходна змагацца ўсім грамадствам. Улада ідзе насустрач міліцыі. Арганізавана відэаназіранне на трасе Р-20, будзе набыты мабільны відэафіксатар, пашыраецца колькасць відэакамер у райцэнтры. Гэтыя меры павінны працаваць на зніжэнне злачыннасці. Забяспечаны кадры участковых інспектараў, якія павінны ўзяць пад свой кантроль сітуацыю ў сельскай мясцовасці. Усе гэтыя меры забяспечаць паляпшэнне сітуацыі ў раёне.
У абмеркаванні пытання браў удзел пракурор раёна С. У. Зайцаў.
Апошнім у парадку дня было пытанне аб арганізацыі корманарыхтоўкі.  Кіраўнік раёна адзначыў, што спецыялісты ўпраўлення сельскай гаспадаркі і харчавання падрыхтавалі дакладны рабочы план, цяпер стаіць задача рэалізаваць яго на практыцы. Якасныя кармы ў неабходнай колькасці – залог стабільнай работы жывёлаводаў, залог стабільных зарплат і паступленняў у бюджэт раёна. У першую чаргу ўвага спецыялістаў упраўлення і сельгасарганізацый павінна быць накіравана на якасць правядзення ўсіх работ і на якасць нарыхтаваных кармоў. Планам прадугледжана дапамога аграрыям раёна з боку гарадскіх арганізацый.
Па ўсіх абмеркаваных пытаннях былі прыняты канкрэтныя рашэнні.
Сяргей ЕРМАЛАЕЎ.
Надрукавана ў №40 ад 26.05.2015 г.