Дождж і мокры снег чакаюцца ў Беларусі ў выхадныя, паведаміла БЕЛТА галоўны сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Людміла Парашчук.[
«Заўтра надвор’е яшчэ застанецца пад уладай сонечнага і сухога антыцыклону. У такой сінаптычнай сітуацыі яно будзе радаваць нас вясеннім цяплом. Але атмасферны ціск падае, на поўдні і поўначы краіны з’явіцца воблачнасць, хоць па-ранейшаму будзе без ападкаў», — адзначыла яна.
Вецер ноччу будзе слабы, днём — паўднёва-заходні 3-8 м/с. Тэмпература паветра ноччу складзе ад 0 да мінус 5, месцамі 6-8 градусаў марозу, днём паветра прагрэецца да 8-13 градусаў. Такі тэмпературны фон на 4-7 градусаў перавышае кліматычную норму для гэтых сакавіцкіх дзён.
У суботу са Скандынаўскага паўвострава на поўнач Беларусі перамесціцца халодны франтальны раздзел, характар надвор’я пачне змяняцца. Ноччу ў паўночных, а днём і ў цэнтральных раёнах краіны прагназуюцца кароткачасовыя дажджы, па поўначы з мокрым снегам. Тэмпература паветра ноччу складзе ад мінус 4 да плюс 3, днём яна будзе 3-9 градусаў вышэй за нуль, па поўдні — 10-13 цяпла.
«З нядзелі прыкметна пахаладае па ўсёй краіне, у наш край вернецца зімовы характар надвор’я. Ноччу на большай частцы тэрыторыі, днём па поўдні чакаюцца кароткачасовыя ападкі (мокры снег, дождж). Дзе-нідзе зноў прыцярушыць сняжком. У асобных раёнах рэспублікі будзе слабы галалёд, на дарогах галалёдзіца», — адзначыла Людміла Парашчук. Тэмпература паветра ноччу складзе ад мінус 5 да плюс 2, па поўначы пры праясненнях чакаецца 6-9 марозу. Днём будзе ад мінус 2 да плюс 5, па поўдні да 7 градусаў вышэй за нуль.
У панядзелак на большай частцы тэрыторыі Беларусі надвор’е будзе вызначаць вобласць павышанага атмасфернага ціску, на поўначы будзе адчувацца ўплыў атмасфернага фронту, які перамяшчаецца з Балтыйскага мора. Па поўначы краіны чакаюцца кароткачасовыя ападкі, у асноўным мокры снег, магчымы слабы галалёд. Тэмпература паветра ноччу — 4-10 градусаў марозу, месцамі да мінус 13, днём — ад 0 да плюс 5, па поўдні месцамі да 7 градусаў вышэй за нуль.
Умовы надвор’я ў аўторак будзе вызначаць франтальны раздзел, але ападкаў ён прынясе нямнога, толькі месцамі пройдуць кароткачасовыя мокры снег і дождж. Ноччу і раніцай у асобных раёнах слабы галалёд, на дарогах галалёдзіца. Тэмпература паветра ноччу складзе ад мінус 5 да плюс 2, па паўднёвым усходзе пры праясненнях да 8 марозу. Днём прагназуецца 2-8 градусаў вышэй за нуль, па паўднёвым захадзе краіны ў разгар дня будзе 9-12 цяпла.
У сераду пацяплее па ўсёй краіне. Тэмпература паветра ноччу складзе ад мінус 3 да плюс 3, днём — 5-12 градусаў цяпла, па поўдні да плюс 14. Месцамі пройдуць кароткачасовыя дажджы.
