Творческую визитку Шумилинского района представили работники культуры

Творчая візітка Шуміліна
Гукі духавога аркестра разліваліся па вуліцы Луначарскага, выходзілі на Кароткіна, Ленінскую,
зачароўвалі, вабілі да сябе прахожых. Што ж там такое ладзіцца ў Доме культуры?
Аказваецца, гэта Шуміліна прэзентавала сваю творчую праграму-візітку. Трэба сказаць, што ў вобласці праходзіць агляд-конкурс творчых праграм-візітак райцэнтраў Віцебшчыны, у сувязі з чым шаноўнае журы конкурсу завітала і да нас.
У візітку Шуміліна, нібы ў вянок, упляталі свае творчыя здабыткі самыя заслужаныя творчыя калектывы. Ігралі народны духавы аркестр выкладчыкаў дзіцячай школы мастацтваў і сямейны амсамбль Скорынавых. Дом рамёстваў падрыхтаваў шыкоўныя выставы, прысвечаныя святам народнага календара, вітаў гасцей узорны лялечны тэатр “Батлейка”, паказаў адмысловыя вырабы народнага клуба народных майстроў “Спадчына”, узяў у палон непаўторнымі стравамі народнага клуба аматараў беларускай нацыянальнай кухні “Разынка”. Тут жа ў фае прадставіў сябе народны калектыў літаратурна-музычнай гасцёўні “Крыніца” цэнтральнай раённай бібліятэкі.
А на сцэне ГДК разгарнулася маляўнічае прадстаўленне “Рэзідэнцыя Дзеда Мароза”. І думаецца, што народны тэатр мініяцюр “Буф”, народны фальклорны калектыў “Гульбічы”, вакальная група народнага хору “Світанак”, узорная эстрадная студыя “Асарці” і народны тэатр Шумілінскага ГДК пераканалі прысутных у тым, што ў Шуміліне абавязкова павінна быць рэзідэнцыя Дзеда Мароза, а журы – у тым, што творчая візітка Шуміліна заслугоўвае самай высокай ацэнкі.
Журы ж вынесе свой вердыкт пасля прагляду ўсіх творчых праграм райцэнтраў.
Аліна КАНСТАНЦІНАВА.
Надрукавана ў №44 за 07.06.2013 г