Услед за дыскатарам пойдзе сеялка
Дажджы на мінулым тыдні не напужалі вясковых працаўнікоў – сонца сушыць глебу добра. На палеткі выехалі трактары з дыскатарамі, чызелямі, плугамі, баронамі.
У канцы мінулага тыдня падрыхтоўка палеткаў да сяўбы ў ААТ «Прыазёрны мір» ішла поўным ходам. З самай раніцы ва ўрочышчы Клінкі працаваў механізатар Сяргей Ціманоўскі. Палеткі не акінуць вокам. Яны ўзараны з восені, і цяпер, зразумела, менш работы і значна эканоміцца час – дастаткова праехаць з дыскатарам.
«У гаспадарцы працую больш за дваццаць гадоў, – кажа Сяргей. – На падрыхтоўцы глебы да сяўбы працую другі год. Мне падабаецца. За светлавы дзень рыхтую да 35 гектараў палеткаў. Дагэтуль вазіў кукурузу, сянаж. Падсохне крыху – і на поле прыедзе засяваць зерневыя Мікалай Жыгуноў».
Каб работа ішла шпарчэй, на дапамогу Сяргею Ціманоўскаму на днях выедзе на МТЗ з культыватарам Віктар Смолікаў, расказаў намеснік дырэктара сельгаспрадпрыемства Мікалай Дубіна. Такім механізатарскім дуэтам падрыхтуюць пад сяўбу зерневых і зернебабовых 700 гектараў палеткаў.
Ларыса ЗАЙЦАВА.
