Народны тэатр Шумілінскага раённага цэнтра культуры стаў лаўрэатам III ступені V Рэспубліканскага фестывалю аматарскага тэатральнага мастацтва «Тэатральныя скрыжаванні» ў Слуцку (Мінская вобласць).
Поспех шумілінскаму тэатру прынёс спектакль «Удовін параход», які нашы артысты ставілі ў мінулым годзе да 80-годдзя вызвалення Беларусі ад нямецка-фашысцкіх захопнікаў. Гэты спектакль цёпла сустрэлі шумілінскія гледачы, на абласным аглядзе-конкурсе «Тэатральная вясна» ён атрымаў самую высокую ўзнагароду – Гран-пры. Перамога і стала падставай для таго, каб шумілінскі тэатр прадстаўляў Віцебшчыну на рэспубліканскім тэатральным конкурсе.
Рэжысёр народнага тэатра Таццяна БАГДАНАВА падзялілася ўражаннямі ад ўдзелу ў фестывалі:
«Выступленне на рэспубліканскім конкурсе для нас было вельмі адказным, тым больш, што ў мінулы раз (конкурс праходзіць раз у два гады) Гран-пры на конкурсе ўзяў заслужаны калектыў Рэспублікі Беларусь народны тэатр “Пілігрым” з Полацка. Яны, дарэчы, выступалі па-за конкурсам як запрошаныя госці і вельмі падтрымлівалі нас.
Спаборнічаць з лепшымі аматарскімі калектывамі з усіх рэгіёнаў Беларусі было няпроста, хваляваліся ўсё. Але сяброўская атмасфера, вельмі добры прыём слуцкіх гледачоў, адносіны журы, якое ўзначальваў заслужаны артыст Рэспублікі Беларусь Уладзімір Мішчанчук, дапамаглі нашым артыстам правільна настроіцца, поўнасцю раскрыцца і вельмі добра выступіць. У зале людзі плакалі, а гэта сведчыць пра тое, што артысты змаглі данесці і перадаць гледачам свае эмоцыі. Дыплом лаўрэата III ступені – значны поспех для выступлення на такім узроўні. Ён вельмі радуе нас і натхняе на новыя перамогі».
Журы таксама адзначыла артыста народнага тэатра Шумілінскага РЦК Аляксея Цімафеева, які ўзнагароджаны дыпломам за ўвасабленне вобраза Вадзіма Громава ў спектаклі.
Таццяна Багданава расказала, што шумілінцы ўважліва глядзелі ўсе спектаклі, пераймалі вопыт лепшых аматарскіх калектываў краіны. Ім вельмі спадабаўся мюзікл «Гур’янаў», у якім галоўную ролю іграў народны артыст Рэспублікі Беларусь Руслан Чарнецкі, які зараз займае пасаду міністра культуры.
Сяргей ЕРМАЛАЕЎ.
