Фёдар Трафімавіч АФАНАСЬЕЎ
Ф. Т. Афанасьеў нарадзіўся ў 1923 годзе ў Куйбышаўскай (зараз Самарскай) вобласці.
Паходзіць з сялянскай сям’і, па нацыянальнасці чуваш. Член УЛКСМ. Пачатак вайны Фёдар Афанасьеў сустрэў у Магілёве, дзе працаваў будаўніком.У складаных умовах з групай сяброў вырваўся з акружанага горада, дабраўся да роднага сяла. У 1942 годзе пайшоў у армію, скончыў Куйбышаўскае пяхотнае вучылішча.
На фронт трапіў у сакавіку 1944 года.
22 чэрвеня 1944 года 20-ы гвардзейскі стралковы полк, у які ўваходзіла рота Афанасьева, атрымаў баявую задачу прарваць варожую абарону ў раёне вёсак Радзькова-Арэхі, выйсці да Заходняй Дзвіны, фарсіраваць яе і захапіць плацдарм на левым беразе.
У ходзе наступлення рота Афанасьева вырвалася наперад. Праціўнік адкрыў моцны артылерыйскі і кулямётны агонь. З крыкамі “За мной! За Радзіму!” Афанасьеў разам са сваімі байцамі ўварваўся ў варожую траншэю. Воіны выбілі ворага і працягвалі яго праследаваць. 24 чэрвеня выйшлі да Заходняй Дзвіны і пад моцным агнём на дапаможных сродках (бярвёны, дошкі, самаробныя плыты) паплылі да левага берага.
На беразе завязаўся жорскі бой за плацдарм. Фёдар Афанасьеў умела кіраваў байцамі, натхняў іх сваім прыкладам. Гвардзейцы захапілі і ўтрымалі плацдарм, але ў апошняй рукапашнай схватцы з ворагам камандзір загінуў.
Ф. Т. Афанасьеў пахаваны ў воінскіх могілках у в. Тропіна.
За подзвіг гвардыі лейтэнанту Фёдару Афанасьеву было прысвоена званне Героя Савецкага Саюза пасмяротна.
Імем Ф. Т. Афанасьева названа вуліца ў аграгарадку Слабада.
