Участковы з дваццацігадовым стажам
Больш за дваццаць гадоў таму кіраўніцтва РАУС прапанавала Юрыю Сільвестраву пайсці служыць у міліцыю. Такая прапанова была нечаканай, бо хлопец на той момант меў педагагічную адукацыю. Але Юрый узважыў усе “за” і “супраць”, параіўся з сям’ёй – і ўладкаваўся ў 2003 годзе ўчастковым інспектарам міліцыі. Працуе шчыра і сумленна – яго прозвішча занесена на раённую Дошку гонару.
Кожную раніцу ў маёра міліцыі Юрыя Сільвестрава, як і ў астатніх участковых, – узбраенне, планёрка, на якой атрымлівае заданні зыходзячы з аператыўнай абстаноўкі ў раёне. А потым – работа на ўчастку. Яго зона адказнасці – тэрыторыя Обальскага сельсавета, самага вялікага па колькасці насельніцтва. У 1700 домаўладаннях 38 вёсак тут пражывае больш за 2,5 тысячы чалавек. Летам людзей становіцца больш – прыязджаюць дачнікі.
Працоўны дзень участковага інспектара непрадказальны: ніколі не ведаеш, што цябе чакае і ў якім населеным пункце апынешся. Выезды па паведамленнях людзей, рэйдавыя мерапрыемствы, прыём грамадзян, вядзенне дакументацыі – гэта ўсё работа ўчастковага. Да таго ж, у Юрыя Сільвестрава адзін са складаных участкаў. Часта прыходзіцца разбірацца з крадзяжамі з дамоў, гаспадарчых пабудоў і падворкаў, выязджаць на сямейныя скандалы. Менавіта на ўчастковага “ліецца” паток людскіх праблем і скаргаў, да яго першага звяртаюцца людзі са сваёй бядой. І ён дапамагае.
«Самыя складаныя дні для ўчастковых – гэта святочныя ці вялікія выхадныя, – кажа Юрый Станіслававіч. – Як правіла, у грамадзян не абыходзіцца без спіртнога, і гэта прыводзіць да боек і канфліктаў. А яшчэ на святы прыязджаюць людзі, якія працуюць вахтавым метадам за межамі рэспублікі. Прыязджаюць з грашыма, нярэдка святкуюць з размахам…».
Адным з важных накірункаў сваёй дзейнасці Юрый Сільвестраў лічыць прафілактычную работу, накіраваную на папярэджанне злачынстваў. Участковы рэгулярна наведвае тых, хто стаіць на ўліках у РАУС, папярэджвае людзей, каб не верылі тэлефонным махлярам і не бралі па іх просьбе крэдыты, праводзіць гутаркі з тымі, хто аднойчы “саступіўся”. Такая работа дае свой плён: у мінулым годзе на тэрыторыі Обальскага сельсавета не зарэгістравана разбояў, забойстваў і цяжкіх цялесных пашкоджанняў.
Юрый Сільвестраў – мнагадзетны бацька, добры муж, які ганарыцца сваёй сям’ёй.
Ларыса ЗАЙЦАВА.
