Задача – павысіць узровень і якасць жыцця сталых і інвалідаў
Пад кіраўніцтвам старшыні раённага Савета дэпутатаў Мікалая Будневіча прайшла адзінаццатая сесія Шумілінскага раённага Савета дэпутатаў 29 склікання. Дэпутаты і запрошаныя з ліку намеснікаў старшыні райвыканкама і начальнікаў упраўленняў, аддзелаў райвыканкама, кіраўнікоў арганізацый разгледзелі, як у Шумілінскім раёне выконваецца рэгіянальны комплекс мерапрыемстваў па рэалізацыі Дзяржаўнай праграмы «Сацыяльная абарона» на 2021-2025 гады. Удзел у рабоце сесіі прыняў член Савета Рэспублікі Нацыянальнага сходу Рэспублікі Беларусь Глеб Лапіцкі.
Старэнне насельніцтва, павелічэнне ў яго структуры долі адзінокіх і адзінока пражываючых грамадзян, захаванне праблемы інвалідызацыі і іншыя сацыяльна-дэмаграфічныя працэсы прыводзяць да росту патрэбнасці ў сацыяльных паслугах. Віцебская вобласць на працягу некалькіх гадоў працягвае заставацца самай сталай у краіне: 27% насельніцтва старэй працаздольнага ўзросту, 26% жыхароў дасягнулі ўзросту 60 гадоў і старэй. У раёнах рэгіёна гэты паказчык яшчэ больш высокі. Так, у Шумілінскім раёне пражываюць 4836 грамадзян старэй за працаздольны ўзрост, што складае 30% ад агульнай колькасці насельніцтва раёна. З улікам 451 чалавека з інваліднасцю колькасць непрацаздольных грамадзян раёна складае 32,8%. У такой сітуацыі яшчэ большую ролю набываюць службы, якія вырашаюць цэлы комплекс праблем гэтай катэгорыі насельніцтва. Такія факты агучыла дакладчык Таццяна Донюш, дырэктар Тэрытарыяльнага цэнтра сацыяльнага абслугоўвання насельніцтва, які выконвае асноўныя функцыі па арганізацыі сацыяльнай падтрымкі і сацыяльнага абслугоўвання грамадзян, і расказала падрабязна, як рэалізуюцца ў раёне падпраграмы «Сацыяльнае абслугоўванне і сацыяльная падтрымка» і «Даступнае асяроддзе жыццядзейнасці інвалідаў і фізічна аслабленых асоб» Дзяржпраграмы «Сацыяльная абарона».
«Па выніках рэалізацыі мерапрыемстваў у 2024 годзе забяспечана выкананне мэтавых паказчыкаў Дзяржпраграмы: па колькасці сталых грамадзян і інвалідаў, ахопленых сацыяльным абслугоўваннем, у працэнтах да папярэдняга года паказчык склаў 108%, планавае заданне 101,3% выканана на 106,6%; па ахопе асобных катэгорый грамадзян правядзеннем абследавання матэрыяльна–бытавых умоў жыцця – 100%; па ўзроўні забяспечанасці грамадзян тэхнічнымі сродкамі сацыяльнай рэабілітацыі – 100% (75 чалавек), – падкрэсліла Таццяна Аляксандраўна. – У 2025 годзе работа па сацыяльнай падтрымцы асоб, якія пацярпелі ад наступстваў войнаў, сталых грамадзян, людзей з інваліднасцю, будзе прадоўжана. Яна будзе накіравана на стварэнне ўмоў, якія спрыяюць падтрыманню здароўя грамадзян, укараненню інавацыйных тэхналогій сацыяльнай работы і новых відаў сацыяльных паслуг, павышэнню ўзроўню бяспечнага пражывання сталых людзей і інвалідаў, умацаванню матэрыяльна-тэхнічнай базы ўстаноў сацыяльнага абслугоўвання».
Даклад дапоўніла старшыня раённай ветэранскай арганізацыі Таццяна Цэрах – адной з самых масавых і актыўных у раёне, якая налічвае 28 пярвічак з агульнай колькасцю каля 2,6 тысячы чалавек.
Мікалай Будневіч, падводзячы вынікі размовы, адзначыў, што многія прапановы, акрэсленыя ў праекце, накіраваны на ўдасканаленне работы ў сферы сацыяльнай абароны насельніцтва, падтрымку сацыяльна неабароненых катэгорый грамадзян.
Сярод прынятых дэпутатамі рашэнняў – мерапрыемствы, накіраваныя на павышэнне эфектыўнасці работы па прафілактыцы правапарушэнняў, зацвярджэнне справаздачы аб выкананні раённага бюджэту за 2024 год, устанаўленне на тэрыторыі раёна мясцовых падатку і збораў і ўвядзенне іх у дзеянне, змяненні ў раней прынятыя рашэнні.
Алена КАРПУШЭНКА
