Лепшая даярка студзеня
Устае а пятай гадзіне раніцы і спяшаецца на ранішнюю дойку, бо там чакаюць 48 кароў – так пачынаецца раніца ў Алены Таліванавай, якая працуе на ферме Башні ААТ «АграБаравінка».
«Нядаўна у мяне быў юбілей прафесіі – вось ужо на працягу дваццаці гадоў працую аператарам машыннага даення, – кажа Алена Генадзьеўна. – спачатку рупілася на ферме Язвіна, потым 14 год – на жывёлагадоўчым комплексе, а зараз практычна год адказваю за групу кароў на ферме Башні. Сярод малочных кароў – Зорка, Цыклоп, Выдра, якія радуюць надоямі ў 17-18 літраў за дзень». Аператар машыннага даення ўдзячна загадчыцы фермы Галіне Барысоўскай, якая згуртоўвае калектыў фермы – тут кожны можа разлічваць на падтрымку і дапамогу.
Па выніках прафсаюзных спаборніцтваў сярод аператараў машыннага даення за студзень у Алены Таліванавай лепшыя вынікі ў раёне. Надой малака на карову склаў 440 кілаграмаў (+31кг да паярэдняга года). Лідара павіншавала старшыня райкама прафсаюза работнікаў АПК Вольга Пусянкова.
Ларыса ЗАЙЦАВА.
