Галоўнае ў рабоце – добры калектыў, пераканана брыгадзір фермы Латкова Алена ЧУПРЫНСКАЯ
Адказны перадавы работнік, які ўмее знайсці падыход да людзей, нацэліць на добрыя вынікі – так кіраўніцтва сельгаспрадпрыемства СУП «Лаўжанскае» кажа пра брыгадзіра вытворчай брыгады ў жывёлагадоўлі фермы Латкова Алену Чупрынскую. Арганізатарскія здольнасці і аўтарытэт жанчыны цэняць у гаспадарцы. Пацвярджэнне гэтаму – вылучэнне летась прозвішча Алены Чупрынскай на раённую Дошку гонару.
Родам з вёскі Залужжа, Алена Якаўлеўна вывучылася на заатэхніка ў Лужаснянскім тэхнікуме і вярнулася на радзіму, дзе і працуе больш за трыццаць гадоў. Практычна ўвесь час – брыгадзірам малочнатаварных фермаў.
На ферме ніколі не бывае прастояў і выхадных, бо жывёла патрабуе пастаяннага догляду. За ўсім сочыць брыгадзір, ён афармляе штодзённыя справаздачы, вядзе дакументацыю, кантралюе расстаноўку кароў, клапоціцца пра рацыён жывёлы, глядзіць за парадкам. І ведае, што галоўнае ў рабоце – добры калектыў. Якімі б якаснымі не былі кармы, якім бы новым не было абсталяванне, а калі няма каму працаваць – якія вынікі чакаць.
Калектыў фермы Латкова дружны і працавіты – па выніках 2023 года дасягнулі надояў 3237 кілаграмаў на карову.
«У жывёлагадоўлі ўсё ўзаемазвязана, вынікі работы не могуць залежыць ад аднаго чалавека, – адзначае Алена Якаўлеўна. – Жывёле трэба стварыць адпаведныя ўмовы і догляд, тады і малако будзе, і прывагі парадуюць. На ферме вопытныя жывёлаводы Аляксей і Дзмітрый Жыгуновы, Уладзімір Андрэеў. Аператары машыннага даення таксама са стажам. Плённа працуюць Ганна Бекач, Надзея Крэменская, Наталля Петрусевіч, Алена Карнілава. Разам даглядаем 185 кароў, а таксама маладняк. Зараз у прафілакторыі знаходзяцца 17 цялят, масавыя ацёлы пачнуцца ў сакавіку».
Алена Чупрынская з’яўляецца яшчэ і брыгадзірам на ферме Мясаедава, да якой ад Латкова каля сямі кіламетраў. Каб туды паспець своечасова, брыгадзір спачатку карысталася мотаколамі, а цяпер – электравеласіпедам. Кажа, што адзін “ужо з’ездзіла”, цяпер набыла больш удасканалены – электразарадкі хапае на 40 кіламетраў. На ім вельмі зручна летам будзе аб’язджаць статкі.
У вольны час Алена Чупрынская чытае кнігі пра каханне, а таксама раённую газету, якую выпісвае ўсё жыццё. Чакае ў госці дзвюх дачок і траіх унукаў – любіць іх пачаставаць смачнай выпечкай.
Ларыса ЗАЙЦАВА.
