«Сіла робатаў» па-за канкурэнцыяй
Каманда «Сіла робатаў» – чацвёртакласнікі СШ № 1 г. п. Шуміліна Антон Воранаў і Арсеній Шарыпаў – заняла першае месца ў абласным рэйтынгу па робататэхніцы. Конкурс праходзіў у Наваполацку і сабраў каманды з 93 устаноў адукацыі Віцебшчыны.
Чацвёртакласнікі СШ №1 Яна Сімакова і Арцём Загацкі з каманды «Хуткасць руху» сталі трэцімі. Дзеці займаюцца ў школьным гуртку «Асновы робататэхнікі», які вядзе Юлія Глаўдзель (яна была і кіраўніком каманд на абласным рэйтынгу). Для таго, каб абараняць гонар школы і раёна на абласным рэйтынгу, каманды прайшлі сур’ёзны ўнутрышкольны адбор.
СЛОВА – КІРАЎНІКУ КАМАНД ЮЛІІ ГЛАЎДЗЕЛЬ:
— У абласным рэйтынгу каманды нашай школы ўдзельнічаюць другі год. Летась мы ўзялі два другія месцы. Сёлета – першае і трэцяе. Вельмі парадавалі Антон і Арсеній. Яны адпрацавалі зладжана, беспамылкова, аператыўна і прафесійна. Хлопцы канструявалі робата-дракона, затым яго праграмавалі. Па ўмовах заданняў дракон павінен быў махаць крыламі, пэўны час лятаць і падаваць розныя гукавыя і светлавыя сігналы. Антон і Арсеній поўнасцю справіліся з заданнямі за час, у два разы меншы адведзенага.
Аляксандр ШЭДЗЬКО.
