Зіма работ прыбаўляе. Сацыяльнага работніка Наталлю Сяргееву з аграгарадка Мішневічы мы засталі ў вёсцы Заобаль – яна насіла сваёй падапечнай Ліліі Картавенка дровы для грубкі, а потым ваду з калодзежа.
Перад гэтым падмяла двор – напярэдадні падсыпала сняжку. Што ні скажыце, а ў зімовы перыяд работы ў сацыяльных работнікаў ТЦСАН значна прыбаўляецца. Трэба і дроў прынесці, і печкі з грубкамі прапаліць, і снег расчысціць, падсыпаць падворкі пяском. «Я абслугоўваю 12 падапечных, якія пражываюць у Мішневічах, Заўсысцы, Заобалі, Адрэеўцы, Валатоўках, – расказала Наталля Сяргеева. – Летам езджу на веласіпедзе, зімой гэты транспарт не падыходзіць, дабіраюся да вёсак часцей пешшу, часам на спадарожным аўтамабілі. Сёлетняя зіма літасцівая да нашых рук, без снегу і галалёду. Заўсёды прыношу ваду з запасам – на выпадак, калі ноччу ціскане мароз (калонкі могуць замерзнуць). Многім падапечным купляю і дастаўляю прадукты – не ўсе ў сілах дайсці да аўталаўкі».
Для людзей сталага ўзросту і інвалідаў ТЦСАН прадастаўляе таксама платныя паслугі, расказала спецыяліст па сацыяльнай рабоце аддзялення комплекснай падтрымкі ў крызіснай сітуацыі Аксана Аўчыннікава. Карыстаюцца папулярнасцю перавозкі на аўтатранспарце, можна заказаць расчыстку снегу, дробны рамонт печкі і грубкі (замазаць трэшчыны, прыбіць перадтопачны ліст).
Сацыяльны работнік Андрэй Тарбееў займаецца некаторымі рамонтнымі работамі: мяняе ўнутраныя дзвярныя замкі, рамантуе і фарбуе дзверы, ганкі. Сталыя людзі могуць заказаць колку і складзіраванне дроў, перанос тарфянога брыкету. За даведкамі можна звяртацца па тэлефоне 5‑71‑88.
Зараз у ТЦСАН працуе 50 сацыяльных работнікаў, якія абслугоўваюць 460 жыхароў раёна.
Ларыса ЗАЙЦАВА.
