«Я выбіраю прафесію інжынера» – пад такой назвай у СШ № 1 г. п. Шуміліна прайшло раённае прафарыентацыйнае мерапрыемства (кірмаш мэтавай падрыхтоўкі).
Мерапрыемства арганізаваў аддзел па адукацыі райвыканкама для вучняў інжынерных класаў СШ № 1 і Кардонскай СШ. На сустрэчу запрасілі і старшакласнікаў СШ № 1.– Зараз у вас вельмі адказны час – час выбару будучай прафесіі, – звярнулася да старшакласнікаў начальнік аддзела па адукацыі Аксана Талстая. – Важна абраць запатрабаваную ў грамадстве прафесію. І адна з такіх прафесій – інжынер. Сёння матываваным вучням стаць студэнтамі вышэйшай навучальнай установы не так складана, дзяржава прадугледзела шэраг ільгот, у тым ліку і для навучэнцаў інжынерных класаў.
Галоўнае ўжо зараз аб’ектыўна суаднесці прафесійныя намеры і магчымасці да залічэння і вучобы ў тым ці іншым універсітэце краіны, каб у апошнія гадзіны прыёму дакументаў не прымаць неабдуманыя рашэнні.
Аксана Генадзьеўна адзначыла, што два гады ў СШ № 1 і першы год у Кардонскай СШ працуюць інжынерныя класы. Сёлета ў СШ № 1 адбудзецца першы выпуск інжынернага класа. Менавіта таму і было прынята рашэнне правесці кірмаш мэтавай падрыхтоўкі «Я выбіраю прафесію інжынера».
Сустрэча пацвердзіла, што інжынерныя спецыяльнасці запатрабаваныя на прадпрыемствах раёна, кіраўніцтва якіх гатова ўжо зараз заключыць з выпускнікамі мэтавыя дагаворы.
Начальнік раёна электрычных сетак Уладзімір Волкаў, начальнік раённага ўчастка электрасувязі Юрый Маскалькоў, начальнік аддзела лясной гаспадаркі і лесаўзнаўлення Шумілінскага лясгаса Антон Шабанаў, спецыяліст па кадрах ДРБУ‑204 Ілона Гурына расказалі пра свае прадпрыемствы, пра тое, якія спецыялісты ім патрэбны і ў якіх навучальных установах можна атрымаць інжынерныя спецыяльнасці адпаведнага профілю.
На сустрэчу з шумілінскімі выпускнікамі дэлегавалі прадстаўнікоў Полацкі дзяржаўны ўніверсітэт і Віцебскі дзяржаўны тэхналагічны ўніверсітэт. У сваіх выступленнях‑прэзентацыях яны падкрэслілі, што ўстановы даюць магчымасць студэнтам асвойваць інжынерныя прафесіі і спецыяльнасці на сучаснай тэхніцы і абсталяванні, з выкарыстаннем навейшых тэхналогій. Ёсць магчымасць атрымаць і міжнародныя стажыроўкі. Асаблівы і вельмі важны бонус для выпускнікоў інжынерных класаў – магчымасць паступіць не некаторыя спецыяльнасці без экзаменаў па выніках субяседвання.
Пасля афіцыйнай часткі старшакласнікі мелі магчымасць у неафіцыйнай абстаноўцы паразмаўляць з прадстаўнікамі прадпрыемстваў і ВНУ.
Аляксандр ШЭДЗЬКО.
