Першы дом з ліфтамі – жыллё для маладых спецыялістаў
У 2025 годзе ў мікрараёне «Брыкет» Шуміліна якраз за дзіцячым садам будзе пабудаваны пяціпавярховы жылы дом – наваселлі справяць 40 маладых спецыялістаў і іх сем’і.
Будаўніцтва шматпавярхоўкі распачалося восенню мінулага года. Кватэры ў доме будуць мець статус арэнднага жылля і прызначаны для маладых спецыялістаў з мэтай іх замацавання ў раёне. Будаўніцтва ідзе за кошт сродкаў рэспубліканскага бюджэту.
Трэба заўважыць, што ў раёне гэта будзе першы дом, у якім прадугледжаны ліфты.
Тэрміны на будаўніцтва адведзены сціслыя. Па словах намесніка старшыні райвыканкама Руслана Насцюшкіна, здача ў эксплуатацыю запланавана на першую палову 2025 года. На сённяшні дзень ужо асвоена 1,5 млн. рублёў.
Будаўніцтва вядзе Шумілінская ПМК-70. На дадзены момант будаўнікі выводзяць другі паверх. Па словах брыгадзіра муляраў Віталя Баранава, надвор’е досыць камфортнае, што спрыяе тэмпам работ і выкананню графікаў. Няма пытанняў і з будматэрыяламі, якія завозяцца з запасам.
Алена КАРПУШЭНКА.
