ДЭПУТАТ-ВЫБАРШЧЫК: ЗВАРОТНАЯ СУВЯЗЬ
Сустрэчы дэпутатаў рознага ўзроўню з выбаршчыкамі ў рамках электаральнай кампаніі праходзяць у гэтыя дні па краіне. Так, 15 студзеня на сустрэчу з калектывам Шумілінскай ЦРБ прыехалі дэпутат Віцебскага абласнога Савета дэпутатаў па Шумілінскай выбарчай акрузе № 52 Міхаіл Вішнявецкі і старшыня раённага Савета дэпутатаў Мікалай Будневіч.
Размова ішла аб маючых адбыцца выбарах кіраўніка краіны і пра грамадзянскі абавязак кожнага выбаршчыка аддаць свой голас за будучыню нашай краіны. Міхаіл Вішнявецкі, які з’яўляецца начальнікам Галоўнага ўпраўлення аховы здароўя аблвыканкама, адзначыў значнае ператварэнне ўстановы і падзяліўся планамі па падтрымцы і развіцці раённай сістэмы аховы здароўя.
У прыватнасці, Міхаіл Лявонцьевіч паведаміў шумілінскім медыкам, што ў бліжэйшы час бальніца атрымае дзве стаматалагічныя ўстаноўкі, тры аўтамабілі (адзін з іх выдзелены ў рамках рэалізацыі сацыяльнага праекта «Даступная медыцынская дапамога з Беларусбанкам»), медабсталяванне, таксама выдзелены сродкі на рамонт педыятрычнага аддзялення. Разам з тым ён папрасіў калег працаваць на месцах яшчэ больш адказна, якасна і самае галоўнае – аператыўна і хутка.
Мікалай Будневіч павіншаваў са шматлікімі святамі, расказаў пра работу дэпутацкага корпуса, ход электаральнай кампаніі і папрасіў падумаць і прапанаваць ідэі, каб рэалізаваць у раёне грамадскія ініцыятывы на карысць малой радзімы.
Улады абяцаюць падтрымку.
Алена КАРПУШЭНКА.
