На Каляды – прэм’ера казкі
Да каталіцкіх Калядаў і Новага года народны тэатр Шумілінскага раённага цэнтра культуры рыхтуе прэм’еру казкі «Па шчупаковай волі». Карэспандэнт раённай газеты пабываў на рэпетыцыі і крыху раскрые сакрэты пастаноўкі.
Незвычайныя прыгоды гультаяватага, але знаходлівага сялянскага хлопца Ямелі (Сцяпан Голубеў) пачаліся пасля таго, як ён адправіўся за вадой на рэчку і злавіў там казачнага шчупака. Трэба ж было Ямелі закахацца ў Царэўну (Дар’я Сцяпанава)! Тут і закруцілася ўсё «па шчупаковай волі, па ямеліным хаценні». У казачным карагодзе апынуліся і Маці Ямелі (Святлана Дземідзенка), і Цар (Іван Гусакоў), і Нянька (Ларыса Дземідовіч), і Вяльможа (Андрэй Трафімаў).
Чым скончацца прыгоды для герояў казкі, вы зможаце пабачыць 25 і 26 снежня ў РЦК.
Казачную атмасферу па задуме рэжысёра-пастаноўшчыка Таццяны Багданавай стваралі мастак-афарміцель Іна Зянькова, мастак па касцюмах Таццяна Янчанка, мастак па святлу Юлія Кірычэнка. Харэаграфію казачным персанажам ставіла Дар’я Сцяпанава, гукавое афармленне ствараў Андрэй Трафімаў. Дэкарацыі рабілі і «ажыўлялі» Мікалай Маргелаў і Павел Кліменцьеў.
Прыходзьце на спектакль-казку абавязкова з дзецьмі. Будзе цікава!
Сяргей ЕРМАЛАЕЎ.
