Месяц – на праверку насення
Са снежня ў раённай інспекцыі па насенняводстве, каранціне і ахове раслін пачалася сур’ёзная і адказная работа – праверка насення зерневых і зернебабовых на кандыцыйнасць, усходжасць і чысціню.
«На працягу лістапада сельгаспрадпрыемствы праводзілі ачыстку насення зерневых і зернебабовых. Была ачышчана 1101 тона, – расказаў начальнік інспекцыі Генадзь Сцепаненка. – Пастаўлена задача да студзеня праверыць усё насенне на кандыцыйнасць, усходжасць і чысціню, чым і займаюцца вядучыя аграномы Таццяна Ткач і Дзіна Калдунова».
На мінулым тыдні былі заяўлены на выпрабаванне 49 тон насення зерневых і зернебабовых. Першымі прывезлі авёс з КУСГП «Ульскі» – усе 17 тон кандыцыйныя, і гаспадарка атрымала сертыфікат якасці. Паступілі на праверку 19 тон гароху з ААТ «Прыазёрны мір» і 13 тон аўсу з ААТ «АграБаравінка».
«Хацелася б большай актыўнасці з боку сельгаспрадпрыемстваў, каб кіраўніцтва не марудзіла з заяўкамі на праверку насеннага фонду», – зазначыў Генадзь Сцепаненка. – Мець пасведчанне аб якасці насення сельскагаспадарчых раслін павінны ўсе гаспадаркі. Без дакумента зерне будзе лічыцца не насеннем, а фуражом».
Ларыса КІСЯЛЁВА.
