«Шуміліна‑1» – па‑за канкурэнцыяй
У нядзелю, 24 лістапада, фізкультурна-аздараўленчы цэнтр арганізаваў адкрыты раённы турнір па міні-футболе, у якім удзельнічалі юнакі 2012-2013 гадоў нараджэння.
За перамогу змагаліся юныя футбалісты з 7 каманд – «Шуміліна-1», «Шуміліна-2», віцебскія «Камсамолец-1» і «Камсамолец-2», «Ушачы», «Лёзна» і «Бешанковічы».
Шумілінскія трэнеры Сяргей Сахончык і Уладзіслаў Траццякоў на турнір выставілі дзве каманды. «Далі магчымасць усім футбалістам, якія займаюцца ў аб’яднаннях па інтарэсах «Гуляем у футбол», выйсці на пляцоўку, – адзначыў Сяргей Сахончык. – У першую чаргу гэта гульнявы вопыт, якога не стае юным спартсменам і які вельмі патрэбен на афіцыйных спаборніцтвах».
«Шуміліна-2» пачало турнір з сустрэчы з «Бешанковічамі». Пачатак матча нашы землякі правалілі і толькі пасля таго, як лік стаў 0:3 шумілінцы зайгралі. Пачалі дамініраваць на пляцоўцы і змаглі забіць 2 галы, праўда на большае не хапіла часу. Далей каманда дзейнічала даволі ўпэўне-на, змагла атрымаць некалькі перамог, якіх, на жаль, не хапіла для таго, каб трапіць у тройку – «Шуміліна-2» заняла чацвёртае месца.
А вось «Шуміліна-1» у першай сустрэчы на класе перамагло «Лёзна» (3:0). Нашы хлопцы паказвалі ўпэўненую і прыгожую гульню. У некаторых матчах шумілінцы падарылі футбольным заўзятарам галявую феерыю («Шуміліна-1» – «Камсамолец-2» – 7:0, «Шуміліна-1» – «Бешанковічы» –6:2). Найбольш складаным стаў паядынак з «Камсамольцам-1», які закончыўся з лікам 1:1.
«Шуміліна-1» стала пераможцай спаборніцтваў, дапоўнілі прызавую тройку каманды «Камсамолец-1» і «Бешанковічы».
Аляксандр ШЭДЗЬКО.
