КІБЕРЗЛАЧЫНСТВЫ. ПРОСТА КЛАДЗІЦЕ ТРУБКУ!
У раёне з пачатку года зарэгістравана 17 кіберзлачынстваў, што на адно больш, чым летась, расказаў першы намеснік начальніка РАУС Вячаслаў Воранаў.
Сярод іх – 9 кібермахлярстваў і 8 крадзяжоў грашовых сродкаў шляхам мадыфікацыі камп’ютарнай тэхнікі. У гэтым накірунку прафілактычную работу праводзяць і супрацоўнікі РАУС, і сродкі масавай інфармацыі, і іншыя зацікаўленыя структуры, але ўсё роўна людзі вядуцца на падман. Зусім нядаўна жыхарка райцэнтра вырашыла заказаць сабе адзенне праз адзін з акаунтаў у Інстаграм. Ёй прапанавалі папярэдне аплаціць тавар. Жанчына адправіла на ўказаны рахунак 150 рублёў. У выніку – ні грошай, ні тавару.
Яшчэ адной жыхарцы раёна паступіў званок на ватсап ад незнаёмца, які прадставіўся супрацоўнікам МТС і прапанаваў змяніць тарыфны план на больш выгадны. Для гэтага трэба было ўстанавіць спецыяльны дадатак, увесці пашпартныя дадзеныя і рэквізіты банкаўскай карткі. У выніку з карткі знікла 1300 рублёў. У абодвух выпадках узбуджаны крымінальныя справы, злачынцаў чакае пазбаўленне волі да трох гадоў.
Супрацоўнікі РАУС нагадваюць галоўныя правілы, як не стаць ахвярай махляроў:
! Калі паступіў званок, і незнаёмцы прадставіліся супрацоўнікамі праваахоўных органаў, МТС, банкаў і просяць дадзеныя банкаўскай карткі ці кажуць, што на ваша прозвішча нехта афармляе крэдыт – КЛАДЗІЦЕ ТРУБКУ. Гэта махляры!
! Калі вам у пацвярджэнне праўдзівасці слоў незнаёмец адправіў фота дакумента, гэта махляр – ніводны супрацоўнік праваахоўных органаў ці банкаў гэтага рабіць не будзе.
Будзьце ўважлівымі і не верце махлярам!
Ларыса ЗАЙЦАВА.
