Сартаванне насення ў разгары
Сартаваннем насення ў ААТ «Прыазёрны мір» пачалі займацца яшчэ ў жніўні – рыхтаваліся да сяўбы азімых культур. А ў канцы верасня прыступілі да ачысткі насення яравых зерневых і зернебабовых.
Падчас нашага прыезду ў гаспадарку на тэрыторыі зернесклада ў Маркаве работы былі ў самым разгары. На сартавальнай машыне «Пектус» працаваў Валерый Лукін. Ён справіўся з 48 тонамі аўсу, амаль 18 тонамі гароху і прыступіў да яравой пшаніцы, якой падрыхтавалі для насення амаль 90 тон.
«Працую на сартавальнай машыне даўно, больш за дваццаць гадоў. За дзень на маім рахунку па 8-9 тон зерня, – расказаў Валерый. – Звычайна мне дапамагае Ларыса Хмыльнікава, мясцовы палявод. А на час яе водпуску падстаўляе плячо загадчыца склада Вольга Голубева».
Вольга Голубева расказала, што сельгаспрадпрыемства працуе ў цеснай сувязі з інспекцыяй па насенняводстве, каранціне і ахове раслін – яе спецыялісты прыязджаюць адбіраць пробы адсартаванага зерня, потым робяць аналіз на ўсходжасць, чысціню, вільготнасць і іншыя параметры. Гэтая работа ўшчыльную пачнецца з наступнага месяца.
«Да вясенняй пасяўной у раёне трэба нарыхтаваць 1500 тон насення яравых зерневых і зернебабовых, – расказаў начальнік раённай інспекцыі па насенняводстве, каранціне і ахове раслін Генадзь Сцепаненка. – Правяраць насенне пачынаем загадзя, каб яшчэ заставаўся час на выпраўленне недахопаў. Да пасяўной усе гаспадаркі раёна павінны быць у поўнай баявой гатоўнасці з якасным пасяўным матэрыялам».
Ларыса КІСЯЛЁВА.
