Уздымаць зябліва, пакуль дазваляе надвор’е!
Асноўная работа на палетках зараз – уздым зябліва. Ёсць тэхніка і паліва – трэба араць, упэўнены аграномы раёна. Восенню ўзарэш – вясной як знойдзеш.
На гэтым тыдні разам з галоўным аграномам СУП «Лаўжанскае» Вольгай Каралёвай мы пабывалі ва ўрочышчы Слабада. Тут працавалі мясцовыя механізатары Кірыл Калдуноў і Валерый Лісаў.
– На МТЗ-3522 з васьмікорпуснымі плугамі ўзнімаю за дзень да 20 гектараў глебы, – расказаў Кірыл Калдуноў. – На высокіх палетках трактар ідзе добра. Помню, у 2019 годзе мы ўздымалі зябліва да студзеня, бо не было маразоў і снегу.
– А ў мяне чатырохкорпусныя плугі, – уступае ў размову Валерый Лісаў. – За дзень на маім рахунку па 9-10 гектараў. Усё залежыць ад контурнасці палеткаў: больш “круцішся” на МТЗ, менш паспяваеш узараць.
Па палетках у Мазурыне ўздымае зябліва Алег Барысевіч. На яго рахунку за дзень – па 17-20 гектараў.
«Лаўжанскія механізатары ўздымаюць за дзень да 50 гектараў глебы, – расказаў дырэктар гаспадаркі Мікалай Какушкін. – Мы ўзнялі больш за 700 гектараў, работы будзем працягваць да таго часу, пакуль дазволіць надвор’е».
На раніцу 21 лістапада ў раёне было ўзнята 5574 га зябліва (амаль 70% да плана). Кіраўнік раёна Сяргей Галынчык патрабуе павялічыць тэмпы. Трэба лавіць кожны спрыяльны для ворыва дзень. Каляндарная зіма на парозе…
Ларыса ЗАЙЦАВА.
