За калектыў – гарой
Дружна і зладжана, падтрымліваючы адзін аднаго – так працуе калектыў фермы Башні ААТ «АграБаравінка». І ў многім гэта заслуга брыгадзіра Галіны Уладзіміраўны Барысоўскай, прозвішча якой сёлета занесена на раённую Дошку гонару.
Галіна Барысоўская заўсёды мела арганізатарскія здольнасці. Менавіта таму кіраўніцтва сельгаспрадпрыемства прапанавала ёй тры гады таму ўзначаліць калектыў фермы.
«Галіна Уладзіміраўна гарой стаіць за калектыў, і нам гэта даспадобы, – зазначыў жывёлавод Міхаіл Трафімаў. – Яна згуртавала нас сваёй напорыстасцю, жаданнем дабівацца вынікаў». Разам з тым Галіна Уладзіміраўна хваліць за руплівасць аператараў машыннага даення Алену Лісоўскую, Юлію Стахееву, жывёлаводаў Святлану Вясна, Міхаіла Трафімава, слесара Сяргея Сямёнава, Аляксандра Куранкова і многіх іншых.
За кастрычнік валавы надой па ферме Башні склаў 85719 кг мала-ка, сярэднясутачныя прывагі цялят – амаль паўкілаграма. За гэтымі паказчыкамі – работа ўсяго калектыву, лічыць брыгадзір. Дабіліся іх дзякуючы абнаўленню статка, добраму догляду і кармленню. Сёлета гаспадарка нарыхтавала дастаткова кукурузнага зерня, з якога робяць муку, што станоўча ўплывае на надоі.
Зараз на ферме Башні сярод 171 каровы ёсць паўсотня першацёлак. Яны стаяць асобна, у іх свой рацыён: акрамя сенажу, атрымліваюць і камбікорм, норма якога разлічваецца ў залежнасці ад надояў кожнай каровы. На ферме ёсць таксама цяляты-малочнікі, цёлкі злучнога перыяду і на дарошчванні (агульнае пагалоўе – 567). Усіх трэба дагледзець, накарміць – гэта непарыўны жывёлагадоўчы канвеер, якім умела кіруе Галіна Барысоўская.
