Дзвюм нашым зямлячкам – Інары Багданавай і Ларысы Глушнёвай, якія выхоўваюць па пяцёра дзяцей,на ўрачыстым прыёме ў аблвыканкаме старшыня аблвыканкама Аляксандр Субоцін уручыў ордэны Маці. Указ № 368 17 верасня аб іх узнагароджанні падпісаў Прэзідэнт Аляксандр Лукашэнка.
Быць добрым – быць шчаслівым
І такая дабрыня зыходзіць і ад Інары, і ад яе мужа Юрыя. Інара кажа, што ёй вельмі пашанцавала з мужам. У абодвух гэта другі шлюб, у якім яны знайшлі адзін аднаго. Юрый не пабаяўся ўзяць у жонкі жанчыну з трыма дзецьмі. Старэйшая дачка Інары Ангеліна ўжо дарослая і жыве асобна. Уладзіслава, якой 15 год, вучыцца ў каледжы ў Віцебску, кожныя выхадныя прыязджае дадому. Кірылу дзесяць гадоў, ён марыць стаць пажарным. Агульныя дзеці Інары і Юрыя – Ілья, якому заўтра, 19 кастрычніка, спаўняецца 6 гадоў, і маленькі Ягорка (1 год 7 месяцаў).
«Пра тое, што ўзнагароджана ордэнам Маці, даведалася з сацыяльных сетак. Гэта быў нечаканы сюрпрыз, – кажа Інара. – Адчула асаблівую гордасць».
Сям’я мае ў Шуміліне дачу, дзе патрабуецца вялікі рамонт. Так што праграміст Юра дзякуючы вялікай сям’і навучыўся абыходзіцца з электрапілой, шрубавёртам, дрылем і іншымі электраінструментамі. Авалодаў і зварачным апаратам – рабіў для дачы агароджу і альтанку. Ёсць і добрыя памочнікі – Кірыл і Ілья.
Інара прызналася, што ніколі не задумвалася, колькі будзе мець дзяцей. Але генетыка спрацавала – у бацькоў Інары чатыры дачкі і сын. Трое з іх таксама мнагадзетныя.
Маці зараз знаходзіцца ў дэкрэтным водпуску, дагэтуль працавала на “Славянскім прадукце”. Ягорка падрос і не дастаўляе маці многа клопату. Так што з’явілася больш часу для сябе і прыгатавання смачных мясных страў. «Для мяне сям’я – гэта галоўны сэнс жыцця, – кажа Інара. – Важна, каб у сям’і было ўзаемаразуменне, тады ўсё будзе ладзіцца».
Ларыса КІСЯЛЁВА.
«Нашу маму па тэлевізары паказвалі!» – пахвалілася чатырохгадовая Даша. У нас ёсць запіс на тэлефоне, як мама расказвае пра нас!».
Для сям’і Ларысы і Міхаіла Глушнёвых было вялікай радасцю, што Ларысе ўручылі ордэн Маці. «Мае бацькі ажно плакалі, калі глядзелі навіны Віцебшчыны», – падзялілася гаспадыня.
Глушнёвы выхоўваюць чатырох дачок і сына. Старэйшай Машы 13 гадоў, яна займаецца валанцёрствам разам з аднакласнікамі.
Адзінаццацігадовы Дзіма захапляецца дрэваапрацоўкай, дзевяцігадовая Аня спрабуе сябе ў танцах, наведвае музычную школу. Дашы 4 годзікі, Кацюшы – 1 год і сем месяцаў. Усе дзеці розныя па характары, але любімыя і дарагія для бацькоў.
Вялікая сям’я жыве ў вялікім доме з мансардай, які пабудаваў Міхаіл са сваякамі. На ўнутраную аддзелку мнагадзетнай сям’і выдзелілі дзяржаўную субсідыю. Пакояў у доме многа, у кожнага дзіцяці ёсць свой уласны. Ля дома – агарод, дзе саджаюць гародніну і садавіну, асабліва дзеці любяць клубніцы.
Як жа мама, якая зараз знаходзіцца ў дэкрэтным водпуску, паспявае спраўляцца з пяццю дзецьмі?
«Нічога, спраўляюся, – смяецца Ларыса, якая да дэкрэтнага працавала медстатыстам у умілінскай ЦРБ. – Толькі з першым бывае вельмі цяжка, таму што нічога не ведаеш, адчуваеш сябе навабранцам і вучышся на хаду. Пры гэтым вельмі перажываеш, ці правільна робіш. А калі праходзіш “школу мамы”, то ўжо лягчэй справіцца і з пяццю дзеткамі. Тым больш, што Маша – мая вялікая памочніца. І Дзіма з Аней за малодшымі дачушкамі прыглядваюць, калі трэба. Многа дзяцей – гэта не толькі вялікія клопаты, але і вялікае шчасце!».
Іх раздзяляе з Ларысай муж Міхаіл. Калі жонка была ў бальніцы, ён заставаўся дома з дзецьмі: быў і за тату, і за маму. Варыў супы і кашы, мыў бялізну, прыбіраў разам з дзецьмі ў доме.
Ларыса і Міхаіл стараюцца выхоўваць сваіх дзяцей дружнымі, здаровымі, каб умелі клапаціцца адзін пра аднаго.
Ларыса ЗАЙЦАВА
