Цяляты чакаюць наваселля
Ля фермы Кардон КУСГП «Ульскі» кіпіць работа. Тут ідзе рэканструкцыя жывёлагадоўчага памяшкання пад беспрывязнае ўтрыманне цялят.
Некалькі гадоў таму, калі ўзводзілася памяшканне, планава-лася, што тут будзе даільная зала. Але будынак поўнасцю так і не давялі да ладу, ён некалькі гадоў ста-яў незапатрабаваным.
Кіраўніцтва гаспадаркі сёлета вырашыла правесці рэканструкцыю памяшкання, каб было куды паставіць цялят на дарошчванні. За работу ўзялася мясцовая будаўнічая брыгада. «Зрабілі ўжо многае, – расказаў майстар будаўнічых работ Ігар Іваноў (на здымку). – З абодвух бакоў паставілі новыя металічныя вароты. Уставілі вокны ў праёмах. Зрабілі рэканструкцыю даху, цяпер ён часткова будзе з полікарбанату».
Разам з будаўнікамі заходзім унутр памяшкання. Сцены-перагародкі, якія былі тут узведзены, разабраны. Уся падлога засыпана бітай чырвонай цэглай. «Цэгла нам спатрэбіцца, калі будзем заліваць падлогу, каб была роўнай, – зазначылі будаўнікі».
Работ па рэканструкцыі фермы яшчэ даволі многа. «Калі будаўнічыя работы будуць зроблены, правядзём водаправод, зробім асвятленне, – расказаў намеснік дырэктара КУСГП “Ульскі” Уладзімір Касцюкоў. – Рэканструкцыю праводзім за ўласныя сродкі. Яна нам прыкладна абыдзецца ў 42 тысячы рублёў. Работы плануем закончыць да лістапада, на новую ферму на зімова-стойлавы перыяд паставім 160 цялят на дарошчванні».
Большасць гаспадарак раёна прыступілі да падрыхтоўкі фермаў да зімы. «Разам з тым маруднымі тэмпамі ідуць работы ва УП «Шумілінскі райаграсэрвіс», КУСГП «Сіроцінскі», – адзначыла начальнік аддзела арганізацыі сельскагаспадарчай вытворчасці ўпраўлення па сельскай гаспадарцы і харчаванні райвыканкама Марына Панкраценка. – Каб халады не засталі знянацку, усім сельгаспрадпрыемствам трэба фарсіраваць работы па падрыхтоўцы жывёлагадоўчых аб’ектаў. 15 верасня спецыялісты райсельгасхарчу правераць, наколькі якасна і ў тэрмін праведзены работы».
Ларыса ЗАЙЦАВА.
