Ці можа бабуля ўзяць для ўнука пуцёўку ў лагер?
Чытачы раённай газеты прасілі расказаць, ці можа бабуля ўзяць для ўнука пуцёўку ў аздараўленчы лагер, калі мама дзіцяці знаходзіцца ў дэкрэтным адпачынку, а бацька працуе ў прыватнай фірме.
«Згодна з заканадаўствам пуцёўка для дзіцяці ў аздараўленчы лагер даецца па месцы работы аднаго з бацькоў, – патлумачыла вядучы спецыяліст прадстаўніцтва Віцебскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва Вікторыя Дружкіна. – У такім разе можна разглядаць розныя варыянты. Калі, скажам, у жанчыны закончыўся дэкрэтны водпуск, а работу яна яшчэ не знайшла, то трэба стаць на ўлік ва ўпраўленне па працы, занятасці і сацыяльнай абароне райвыканкама. Тады за льготнай пуцёўкай для дзіцяці трэба звяртацца ў наша прадстаўніцтва. Ёсць і другі варыянт: калі гаспадар сям’і, напрыклад, працуе дальнабойшчыкам у фірме Рэспублікі Беларусь, то трэба звярнуцца да свайго кіраўніцтва, якое ў сваю чаргу пахадайнічае пра выдзяленне льготнай пуцёўкі ў аддзеле па адукацыі райвыканкама. Калі ж мужчына працуе ў фірме Расійскай Федэрацыі, то, зноў жа, трэба звяртацца з хадайніцтвам у аддзел па адукацыі, але ў гэтым разе пуцёўка будзе выдзелена не па льготнай цане, а за поўны кошт».
Дзеці маюць права на атрыманне пуцёўкі ў лагер з кругласутачным знаходжаннем з выкарыстаннем дзяржаўных сродкаў не больш аднаго раза ў каляндарным годзе (выключэнне – дзеці-сіроты і тыя, якія выхоўваюцца ў прыёмных і апякунскіх сем’ях, інтэрнатах, дзіцячых дамах; дзеці з мнагадзетных і няпоўных сем’яў; дзеці непрацуючых пенсіянераў). Бацькоўская плата за пуцёўку ў лагеры з кругласутачным знаходжаннем тэрмінам не менш за 15 сутак ўстанаўліваецца ў памеры не менш за 10% ад яе поўнага кошту. Рашэнне аб памеры змяншэння кошту пуцёўкі прымае прафсаюзная арганізацыя. Разлічыцца за выдзеленую пуцёўку бацькам варта да моманту звароту за яе выдачай на рукі.
Ларыса КІСЯЛЁВА.
