«Чайка» аб’ядноўвае працавітых
Стала добрай традыцыяй, што на летніх канікулах пры Обальскай СШ працуе лагер адпачынку і працы «Чайка», у якім сёлета бавяць час 12 падлеткаў.
– У «Чайку» падлеткі ідуць з задавальненнем, бо гэта добрая магчымасць не толькі адпачыць, а і зарабіць грошай, – расказвае начальнік лагера Вольга Баранава. – Праграма лагера вельмі насычаная. Спачатку дзеці працуюць у залежнасці ад узросту ад 2 гадзін 18 хвілін (14-гадовыя) да 3 гадзін 30 хвілін (16-гадовыя). Пасля работы – забаўляльная праграма.
Лагер дзейнічае з 3 чэрвеня, падлеткі працавалі на добраўпарадкаванні школьнай тэрыторыі: садзілі кветкі, займаліся праполкай і палівам школьнага агарода. Пасля работы ўдзельнічалі ў мыльным шоу, праводзілі час за праглядам і абмеркаваннем фільмаў.
«На наступным тыдні хлопцы будуць рыхтаваць школьныя кабінеты да касметычнага рамонту, выносіць шафы, пар-ты, дзяўчаты працягнуць працаваць на школьнай тэрыторыі, – дзеліцца планамі Вольга Баранава. – Цікавай павінна быць сустрэча з прадстаўнікамі «Віцебскэнерга», якія не толькі правядуць прафарыентацыйную работу і нагадаюць пра правілы электрабяспекі, а і прапануюць гульнявую праграму».
– У лагеры працы і адпачынку першы раз, – расказаў Андрэй Лук’янаў. – Закончыў 10-ы клас. Свядома пайшоў у гэты лагер, бо хачу дапамагчы стаць яшчэ лепш роднай школе, у якой буду вучыцца апошні год. За змену ў лагеры думаю зарабіць каля 200 рублёў.
Свядома пайшла ў лагер і Ангеліна Пастарнакова, якая закончыла 8-клас:
– А што дома проста так сядзець? Сумна і нецікава. А тут з сябрамі школе дапамагаем, у розных мерапрыемствах удзельнічаем. Паспелі на школьным агародзе папрацаваць, клумбы прапалоць. Час у «Чайцы» ляціць непрыкметна.
Лагер працы і адпачынку пры Обальскай СШ будзе працаваць да 21 чэрвеня.
Аляксандр ШЭДЗЬКО.
