Залаты медаль за выдатную вучобу
Сёння, 14 чэрвеня, у школах раёна пройдуць выпускныя вечары, на якіх выпускнікам 11 класаў уручаць атэстаты аб агульнай сярэдняй адукацыі і сертыфікаты цэнтралізаваных экзаменаў. Восем з іх па выніках вучобы атрымаюць атэстат аб агульнай сярэдняй адукацыі асаблівага ўзору з узнагароджаннем залатым медалём.
Залатыя медалісты! Гонар школы і напружаныя гады заняткаў для вучняў, якія не мелі права на памылку. Перад сабой ва ўсялякім выпадку. Бо, каб выдатна вучыцца, акрамя выключных здольнасцей, трэба мець асаблівы стрыжань у характары. Медалісты, іх бацькі і настаўнікі дакладна ведаюць, што кошт залатога медаля вымяраецца колькасцю ўкладзенай працы ды розных перажыванняў-хваляванняў. Медаль – дарослая ўзнагарода за дзіцячыя гады старання.
Сёлета сярэднюю школу з залатым медалём скончылі выпускніцы Шумілінскай СШ № 1 Кацярына Лінкевіч, Стэла Шылава, Кіра Багданава, Дар’я Шылко, Арына Кляцкова, выпускніцы Шумілінскай СШ № 2 Ганна Гайлова, Наталля Шабайлава і выпускнік Обальскай СШ Станіслаў Барцэвіч. Яны атрымалі выдатныя адзнакі па выніках навучальнага года, пацвердзілі іх на цэнтралізаваных экзаменах.
Ёсць падстава ганарыцца і выпускніцай Шумілінскай СШ № 1 Алінай Маскальковай (настаўнік Л. Б. Сіліна), якая цэнтралізаваны экзамен па рускай мове здала на 100 балаў.
Пасведчанні аб агульнай базавай адукацыі атрымалі 212 вучняў 9-х класаў, з іх 6 – асаблівага ўзору. Гэта значыць, што вучні Шумілінскай СШ № 1 Кацярына Волкава, Соф’я Кучко, Ганна Аглушэвіч, Вераніка Ісакава, Уладзіслаў Донаў і дзевяцікласнік Обальскай СШ Марк Чарнічэнка ўзялі курс на залаты медаль.
СЛОВА – МЕДАЛІСТАМ
Ганна ГАЙЛОВА, СШ № 2: Вось і закончылі мы школу, якая за 11 год стала для нас другім домам. Рада, што ў мяне ўсё атрымалася. Збіраюся паступаць у БДУ на эканамічную спецыяльнасць.
Наталля ШАБАЙЛАВА, СШ № 2: Бывай, школа, прывітанне дарослае жыццё. Далей хачу працягнуць вучобу ў БДУ, на факультэце філасофіі сацыяльных навук. Чаму такі выбар? Захапляю-ся псіхалогіяй і хачу развівацца ў гэтым накірунку.
Станіслаў БАРЦЭВІЧ, Обальская СШ: Буду паступаць у БДУІР на інжынера-праграміста. Інфарматыка на сур’ёз-ным ўзроўні цікаўлюся з класа восьмага. Хочацца, паступіць, тым больш, што фізіку на ЦЭ здаў на 89 балаў, думаю не менш будзе і па матэматыцы.
Кацярына ЛІНКЕВІЧ, СШ № 1: Узяла мэтавае накіраванне ад вобласці і буду паступаць на лячэбную справу” ў Віцебскі медыцынскі ўніверсітэт. Магчыма, пасля вучобы мяне накіруюць працаваць у Шуміліна.
Кіра БАГДАНАВА, СШ № 1: Яшчэ не вызначыла дакладна з навучальнай установай. Ведаю толькі, што хачу вучыцца ў Мінску. Выбрала для сябе сферу эканомікі, бо дакладныя навукі мне даюцца лёгка.
Арына КЛЯЦКОВА, СШ № 1: Я таксама выбрала для сябе сферу эканомікі. Буду паступаць у Беларускі дзяржаўны эканамічны ўніверсітэт або ў Беларускі дзяржаўны тэхналагічны ўніверсітэт.
Стэла ШЫЛАВА, СШ № 1: У мяне душа ляжыць да медыцыны. Далёкія мае сваякі працуюць у бальніцах іншых гарадоў. Мая мара – стаць хірургам.
Дар’я ШЫЛКО, СШ № 1: А я сярод сваіх сваякоў буду першым медыкам. Выбрала для сябе стаматалагічны факультэт Віцебскага медуніверсітэта. Спадзяюся, у мяне ўсё атрымаецца.
Аляксандр ШЭДЗЬКО, Ларыса ЗАЙЦАВА.
