Летняе падарожжа пад пунсовым ветразем
5 чэрвеня ў Лескавічах было як ніколі мнагалюдна і ажыўлена – пачалася першая змена ў аздараўленчым лагеры «Пунсовы ветразь». Бывай, школа, урокі, ранняе абуджэнне і гарадская мітусня! Прывітанне, сябры, весялосць і чыстае загараднае паветра! У дзень заезду ў «Пунсовым ветразі» пабываў і карэспандэнт раённай газеты.
– За 16 дзён змены у лагеры адпачнуць 75 дзяцей, – расказвае начальнік лагера Святлана Раманава. – Мы добра падрыхтаваліся да прыёму дзяцей. Адрамантавалі дах на сталовай, устанавілі душавыя кабінкі, часткова замянілі мэблю, зрабілі касметычны рамонт у пакоях.
Сумаваць не прыйдзецца!
Калі казаць пра вольны час у «Пунсовым ветразі», то ён арганізаваны на належным узроўні.
– Кожны дзень адметны рознымі мерапрыемствамі, – працягвае Святлана Раманава. – Дзяцей чакае цікавая і насычаная праграма: «Міс і містар лагера», «Зарнічка», піяр-кампанія «Зроблена ў Беларусі», прысвечаная Году якасці. Таксама пройдземся «Маршрутамі бяспекі» і згадаем правілы пажарнай, воднай, электрычнай і фінансавай бяспекі, правілы
дарожнага руху. Штодзень будуць і спартыўныя мерапрыемствы: валейбол, футбол, розныя эстафеты. Пройдуць у нас і Малыя алімпійскія гульні. Канечне, будзем і купацца на
возеры. Галоўнае, каб надвор’е не падвяло.
Смачна есці!
Што тычыцца харчавання, яно ў лагеры пяціразовае і вельмі разнастайнае. Прыгатаваць столькі ежы дома штодня не хопіць ні часу, ні цярпення! Так, у дзень заезду ў лагер
меню было такое: абед: салата «Ветразь», суп бульбяны, смажаніна па-хатняму, хлеб, батон, кампот з груш; падвячорак: сок, апельсін, пячэнне; вячэра: памідор свежы, птушка ў сыры, каша аўсяная, хлеб, батон, чай з лімонам, сырок глазураваны; другая вячэра: ёгурт, батон.
І гэта без сняданку, які ў дзень заезду не прадугледжаны.
Слова – бацькам…
Ірына Яблыкава, Шуміліна: Дзевяцігадовы Расціслаў ўпершыню будзе ў кругласутачным лагеры. Сын сам выказаў жаданне паехаць сюды. Кошт пуцёўкі нашу сям’ю задаволіў, умовы ў Лескавічах – добрыя. Плюс і тое, што лагер знаходзіцца недалёка ад Шуміліна.
Вольга Дзямідава, Віцебск: – Пра «Пунсовы ветразь» да ведалася праз інтэрнэт. Найперш звярнула ўвагу, што лагер месціцца ў лясным масіве, побач возера – адпачывай ад гарадской мітусяніны. Кошт пуцёвак прымальны. Думаю, што маім сынам запомніцца адпачынак у лагеры яркімі і пазітыўнымі эмоцыямі.
…І дзецям
З Анастасіяй Івановай з Віцебска, Ульянай Мамехінай, Анастасіяй Чабровай і Міланай Грачушнік (усе з Шуміліна) размаўлялі падчас засялення ў пакой:
– Вось толькі пазнаёміліся. І ўжо пасябравалі. Хочацца, каб было шмат цікавых мерапрыемстваў. З нецярпеннем чакаем, калі зможам паплаваць у возеры.
Глеб Кулецкі, Шуміліна: У лагеры быў у мінулым годзе. Вельмі спадабалася, таму прыехаў і сёлета. Ад лагера чакаю прыемных сюрпрызаў і такіх яркіх мерапрыемстваў, як Дзень Нептуна, які праходзіў летась. У мінулым годзе пасябраваў з многімі, хто тут адпачываў. Спадзяюся, што зноў сустрэнемся ў лагеры.
Аляксандр ШЭДЗЬКО.
