Працоўная перамога ляжнёўцаў
Райкам прафсаюза работнікаў АПК падвеў вынікі працоўных спаборніцтваў за люты сярод аператараў па доглядзе за маладняком буйной рагатай жывёлы і аператараў машыннага даення. У пераможцы выйшлі работнікі ААТ «Ляжні» — Ірына Жогаль і Таццяна Голубева. Абедзвюх жанчын аб’ядноўвае працавітасць, адказнасць і любоў да жывёлы, адзначае кіраўніцтва сельгаспрадпрыемства.
Ірына Жогаль працуе на ферме Ляжні‑4 аператарам па доглядзе за маладняком буйной рагатай жывёлы ужо 23 гады. У яе групе зараз больш за 130 цялят на дарошчванні, забяспечаны сярэднясутачныя прывагі цялят 542 грамы.
Працоўны стаж Таццяны Голубевай, аператара машыннага даення фермы Ляжні‑2, таксама больш за дваццаць гадоў. У свой час жанчына працавала аператарам па штучным асемяненні жывёлы, перамагала ў раённых спаборніцтвах. Але зразумела, што догляд і даенне жывёлы ёй бліжэй. «Узяла сабе групу раздою, даглядаю 73 каровы, — расказала Таццяна. — Мяркую, што на гэтай групе буду працаваць і надалей. Таму ў маіх інтарэсах раздаіць кароў якасна. У любіміцах — Уражына, якая зараз дае больш за дваццаць літраў малака. А ўвогуле за люты надой на кожную жывёлу склаў 323 кг. Зараз кормім кароў сенажом, даём сена і камбікорм. Даглядаю і так званы “дзіцячы сад” — 21 цяля з нараджэння і пакуль не дасягнуць вагі ў 50 кілаграмаў».
Пераможцаў прафсаюзных спаборніцтваў павіншавала старшыня райкама прафсаюзаў работнікаў АПК Вольга Пусянкова, уручыла дыпломы і падарункі.
Ларыса ЗАЙЦАВА.
